Ministrja e Arsimit, e Shkencës, e Teknologjisë dhe Inovacionit, Arbërie Nagavci, në emisionin “Kallxo Përnime”, ka treguar se ushtrues i detyrës së drejtorit Pedagogjik të Kosovës është emëruar njëri nga shefat e sektorit, Ismet Potera, i cili edhe më parë ka qenë u.d. i drejtorit në këtë Institut. Zoti Potera është emëruar në vend të ish-drejtorit Çoçaj, i cili para dy ditësh ka marrë vendimin për shakrkim.
Përveç drejtorit të Institutit Pedagogjik të Kosovës, Nezir Çoçaj, vendime për shkarkim janë nxjerrë edhe për drejtorin e Qendrës së studentëve Fatmir Sfishta, dhe drejtorin e Inspektoratit në MASHT, Defrim Gashi.
“Të tre këta zyrtarë të lartë që janë në këto pozita të rëndësishme është gjetur që janë emëruar në këto pozita me akt-emërime të paligjshme në kohën kur janë emëruar në këto pozita. Janë tri vendime të ndryshme, të tria të nënshkruara nga i njëjti ish-sekretar i Ministrisë së Arsimit, të tri në kundërshtim me legjislacionin edhe në atë kohë pra jo tani”- ka thënë Nagavci në emisionin “Kallxo Përnime”. Sipas saj, janë caktuar zyrtarë në pozita të larta me akt-emërim me pozitë të përhershme. “Që të tri këto pozita janë pranuar në konkurs në pozitë më të ulët dhe pastaj me akt-emërim janë vendosur në pozita të larta dhe njëkohësisht u janë vendosur si pozita të përhershme, pra pozitë që vazhdon deri në pensionim”-ka shtuar ajo.Sipas Nagavcit, prej koeficientit 10 të tre këta persona kanë kaluar në koeficientin 16”, ka thënë ajo.
Përveç caktimit të u.d. të drejtorit në Institutin Pedagogjik të Kosovës, është caktuar edhe u.d. i drejtorit në Qendrën e Studentëve, ndërsa në inspektorat pritet të zgjidhet ditët nëvijim.
