Opinion nga Frashër Oseku
UNË FRASHËR OSEKU KAM NJË LETËR TË HAPUR PËR VETERANËT E VËRTETË TË LUFTËS DHE POPULLIN E KOSOVËS
Unë, Frashër Oseku, që nga dita e parë kam refuzuar të jem pjesë e një organizate që nuk përfaqëson idealet e Ushtrisë Çlirimtare të Kosovës. Kam refuzuar statusin e veteranit nga Organizata e Veteranëve të Luftës së UÇK-së (OVL-UÇK) sepse kjo organizatë nuk është më ajo që duhet të ishte: një zë i vërtetë i atyre që luftuan për lirinë e Kosovës. Përkundrazi, ajo është kapur nga partitë politike, kryesisht nga PDK dhe AAK, dhe është shndërruar në një vegël për interesa personale dhe politike.
Sot, në vend që të mbrojë të drejtën e veteranëve të ndershëm, kjo organizatë ka zgjedhur të mbrojë interesat e partive dhe individëve që e kanë shkatërruar këtë vend. Në vend që të nderojë sakrificën e atyre që dhanë jetën për Kosovën, ajo ka lejuar që lista e veteranëve të fryhet me emra të rremë, duke e kthyer këtë status në një tallje të paturpshme ndaj atyre që vërtetë luftuan me armë në dorë. A mund ta quajmë këtë drejtësi? A mund ta quajmë këtë respekt për luftën tonë?
TRADHTIA NDAJ LUFTËS DHE REPUBLIKËS
UÇK-ja nuk luftoi për interesa personale, për tenderë e për pushtet, por për një Kosovë të lirë, të drejtë dhe sovrane. Çfarë shohim sot? Një OVL-UÇK që hesht përballë korrupsionit, një organizatë që bashkëpunon me partitë politike të cilat po e çojnë Kosovën drejt rrënimit. Kjo organizatë nuk mbron më vlerat kombëtare, por interesat e një grushti njerëzish që e kanë kapur shtetin dhe po e mbajnë peng zhvillimin e tij.
A është kjo ajo për të cilën luftuam? A është ky ideali i Adem Jasharit, i Zahir Pajazitit, i Mujë Krasniqit dhe i mijëra dëshmorëve që ranë për Kosovën? Jo! Kjo është një tradhti ndaj sakrificës së tyre. Kjo është një organizatë që punon për pushtetin, jo për historinë!
NJË THIRRJE PËR DISTANCIM
Sikurse edhe Gezim Mekuli, unë kam zgjedhur të mos jem pjesë e kësaj organizate dhe ftoj të gjithë veteranët e ndershëm të distancohen nga ajo. Të gjithë ata që vërtetë e ndjejnë se kanë luftuar për Kosovën dhe jo për interesa partiake duhet ta thonë hapur: Nuk e njohim këtë organizatë si përfaqësuese të idealeve të luftës sonë!
Të nderuar bashkëluftëtarë, nëse vërtetë besoni në drejtësi, nëse vërtetë besoni në sakrificën e asaj lufte, atëherë mos lejoni që emrat tanë të përdoren për qëllime politike! Nuk jemi ne ata që luftuam për ta pasuruar një grusht njerëzish. Nuk jemi ne ata që dolëm malit për të krijuar një kastë të paprekshme që sot tallet me popullin dhe veteranët e vërtetë.
NUK KA LIRI PA TË VËRTETËN
Sot, Republika e Kosovës është në rrezik nga ata që e kanë kapur shtetin dhe po e minojnë atë për përfitime personale. OVL-UÇK nuk është më zëri i luftëtarëve, por zgjatimi i partive që e kanë keqpërdorur dhe rrënuar këtë vend.
Dhe unë, Frashër Oseku, e kisha me të drejtë që nga fillimi. Sepse nuk mund të jem pjesë e një mashtrimi! Sepse nuk mund të pranoj që lufta jonë të keqpërdoret për karrierë dhe para! Sepse e dua Kosovën, por jo të kapur nga hajdutët e politikës!
Ftoj të gjithë ata që e ndjejnë të njëjtën gjë të mos heshtin. Është koha të flasim. Është koha të mbrojmë idealet e vërteta për të cilat luftuam.
Lavdi dëshmorëve! Turp atyre që e shkelin gjakun e tyre për përfitime personale!
Me respekt,
Frashër Oseku
