Në orët e para të mëngjesit të sotëm, objekti i ish- Gjimnazit të Vjetër në Ferizaj, u përfshi nga zjarr masiv, duke shkaktuar dëme të mëdha.
Gjimnazi i parë i Ferizajt, i njohur si “Gjimnazi i Vjetër” që është djegur është në mbrojtje të shtetit si trashëgimi kulturore, dhe deri më tani disa herë i është vënë flaka.
Pas lajmit për djegien e tij dhe reagimeve të shumta deri në nivel të deputetëve, tani një reagim ka lëshuar edhe Komuna e Ferizajt.
Në njoftim thuhet se Komuna e Ferizajt, përmes Drejtorisë së Shërbimeve Publike dhe Emergjencë, Shërbimit të Zjarrfikjes, me të marr informatën, ka dalë në vendngjarje duke ndërmarr të gjitha veprimet e nevojshme, me gjithë kapacitetin e plotë, për të shuar zjarrin.
“Komuna e Ferizajt, kërkon nga organet hetimore, organet e ndjekjes dhe gjyqësore që të zhvilloj hetim të tërësishëm të rastit dhe që shkaktarët e zjarrit të bëhen publike për qytetarët. Ky objekt përfaqëson vlerë të trashëgimisë kulturore të Ferizajt, andaj Komuna e Ferizajt me gjithë kapacitetin e saj e kompetencën ligjore, do ta mbroj këtë objekt për t’ja ofruar publikut, pas punës restauruese që do të ndodh në këtë objekt”, thuhet nga komuna.
I njëjti objekt bëhet e ditur se të hënën e 13 marsit 2023, ka nisur të rinovohet tërësisht nga ana e operatorit ekonomik të kontraktuar nga Ministria e Kulturës, Rinisë dhe Sportit.
Në reagimin e tij deputeti i Kuvendit të Kosovës, Enver Haliti tha se me veprimet e tilla që janë bërë didsa herë, krimi i organizuar dëshiron që ta shlyejë historinë e Ferizajt.
Ai ka kërkuar nga organet e rendit që ta hetojnë dhe të zbulohet urdhërdhënësi i këtij krimi.
“Krimi i organizuar dëshiron që ta shlyejë historinë e Ferizajt. Sot për herë të katërt ose të pestë i vihet flaka objektit të mbrojtur të trashëgimisë kulturore, ish Gjimnazit të parë shqiptar Ismail Qemali në Ferizaj. Ftoj organet e rendit që ta hetojnë dhe të zbulohet urdhër dhënësi i këtij krimi. Turp!”, ka shkruar në reagimin e tij deputeti Haliti.
