Instituti Hidrometeorologjik i Kosovës (IHMK) ka njoftuar se nga pasditja e sotme deri nesër pritet të ketë pritet të ketë ndryshim të temperaturave që do të përcillen me reshje shiu, e të cilat në disa pjesë të Kosovës mund të shkaktojnë edhe vërshime.
Sipas parashikimeve dhe llogaritjeve të IHMK-së, (Sektorit të hidrologjisë dhe Prognozave Hidrologjike), duke filluar nga pasditja e sotme dhe nesër pritet të ketë reshje shiu, fillimisht në pjesën perëndimore dhe jugore.
Këto reshje thuhet se mandej gradualisht do ta përfshijnë pjesën më të madhe të vendit, ndërsa intensiteti dhe sasia më e madhe e tyre pritet të jetë në pjesë jugore dhe jugperëndimore të Kosovës.
“Si pasojë e këtyre reshjeve nëpër disa pjesë të Kosovës, sidomos në Pellgun e Lumit Lepenc (Brezovicë, Shtërpcë, Kaçanik, Hani Elezit, Ferizaj), pastaj pjesa jugore e Dukagjinit (rrethi i Prizrenit, Therandës, Dragashit etj.), mund të krijohen vërshime të shpejta, të cilët mund të shkaktojnë vështirësi dhe probleme, si në rrëshqitje të dheut, mbyllje të kanalizimeve dhe vështirësi të qarkullimit”, thuhet nga Instituti Hidrometeorologjik i Kosovës./KosovaNews/