Kryeministri në detyrë i Kosovës, Albin Kurti, ka pritur në takim lamtumirës ambasadorin e Turqisë në Kosovë, Sabri Tunç Angili, të cilin e falënderoi për kontributin e tij në forcimin e marrëdhënieve ndërmjet dy vendeve.
Në një postim në Facebook, Kurti theksoi se i ka shprehur ambasadorit mirënjohje për mbështetjen e vazhdueshme të Turqisë ndaj Republikës së Kosovës.
“Sot prita në takim lamtumirës ambasadorin e Turqisë në Kosovë, Sabri Tunç Angili, të cilit i shpreha falënderim për mbështetjen e vazhdueshme të Turqisë ndaj Republikës së Kosovës dhe angazhimin e tij për forcimin e bashkëpunimit ndërmjet dy vendeve tona mike”, ka shkruar Kurti.
Kryeministri ka vlerësuar se Turqia ka qenë një nga partnerët dhe aleatët më të rëndësishëm të Kosovës që nga çlirimi dhe shpallja e pavarësisë.
“Turqia ka qenë partnere dhe aleate e Republikës sonë, që nga çlirimi, shpallja e pavarësisë dhe përmes raporteve gjithnjë në rritje ajo është një prej shteteve që vendi ynë bashkëpunon shumë në aspektin ushtarak dhe të mbrojtjes si dhe të ekonomisë e tregtisë”, ka theksuar Kurti.
Në fund të mesazhit të tij, Kurti i uroi ambasadorit Angili suksese në angazhimet e ardhshme.
“Ambasadorit Angili i uroj suksese dhe punë të mbarë në angazhimet e tij në vijim”, ka përfunduar Kurti.
