Ministrja e Drejtësisë së Kosovës, Albulena Haxhiu, ka dërguar një letër ministres serbe të drejtësisë, Maja Popoviq, ku kërkon transferimin e qytetarëve kosovarë të burgosur në burgjet e Serbisë në Kosovë për t’u gjykuar në mënyrë të drejtë dhe të paanshme.
Haxhiu, në një postim në platformën X, ka identifikuar qytetarët Nezir Mehmetaj, Hasan Dakaj, Sadik Duraku dhe Tefik Mustafa si persona të mbajtur në burgjet serbe.
“Javën e kaluar kam kërkuar nga ministrja serbe e drejtësisë që të transferohen qytetarët tanë që mbahen në burgjet serbe. Nezir Mehmetaj, Hasan Dakaj, Sadik Duraku dhe Tefik Mustafa duhet të kthehen në Kosovë për një gjykim të drejtë dhe të paanshëm nga autoritetet”, ka shkruar Haxhiu.
Në letër, Haxhiu është referuar edhe në marrëveshjen bazike për normalizimin e marrëdhënieve mes dy shteteve, duke theksuar nevojën për respektimin e të drejtave të të burgosurve dhe përmbushjen e angazhimeve ndërkombëtare.
Ndryshe, disa prej kosovarëve të arrestuar po qëndrojnë tash e disa vite në burgjet e Serbisë.
Last week, I requested the Serbian Minister of Justice to transfer our citizens who are being held in Serbian prisons. Nezir Mehmetaj, Hasan Dakaj, Sadik Duraku, and Tefik Mustafa should be returned to 🇽🇰 for a fair and impartial trial by the authorities. pic.twitter.com/P5jd9KrG9w
— Albulena Haxhiu (@albulenahaxhiu_) July 1, 2024
