Në Komunën e Shtimes, Ministria e Arsimit, Shkencës, Teknologjisë dhe Inovacionit ka vënë gurthemelin e sallës sportive, ndërkohë që ka pasur edhe renovime në një çerdhe.
Nxënësit e shkollës “Idriz Ajeti” në Pjetërshticë të Shtimes do të kenë kushte shumë të mira të zhvillimit të aktiviteteve sportive dhe kulturore, pasi sot u bë përurimi i sallës sportive, ku e pranishme ishte edhe ministrja Arbërie Nagavci.
“Përfundimi i punëve të filluara po ashtu edhe nisja punëve të reja të cilat krijojnë kushte më të mira për fëmijët tanë me infrastrukturën moderne shkollore dhe krijimin e parakushteve për zhvillimin e mësimit në kushte më të mira është një arritje rezultat i cili na bënë të lumtur dhe besojë që edhe mësimdhënësit në punën e tyre të përditshme me nxënësit në kushte më të mira do t’i kenë edhe rezultatet më të mira”, ka thënë Nagavci.
Drejtuesit e Komunës së Shtimes thanë se çdo ditë po krijohen kushte më të mira në procesin edukativo -arsimor.
“Për qytetarët e komunës së Shtimes dhe për mua si kryetar është ditë e lumtur, ditë kjo që do të jetë e shënuar në krijimin e kushteve bashkëkohore për edukimin dhe mësimdhënien në komunën e Shtimes”, ka thënë Qemajl Aliu, kryetar i Shtimes.
Për realizimin e këtyre tri projekteve, Ministria e Arsimit ka ndarë rreth 3 milionë euro.
