Gjykata Komerciale e Kosovës ka marrur vendim që të pezullojë punimet në rrugën Jim Xhema e njohur ndryshe si Rruga A.
Në aktvendimin e siguruar nga Kosovanews, thuhet se aprovohet si e bazuar kërkesa e paditësit “pro&COgroup” shpk. Gjithashtu në pikën 2 të këtij aktvendimi thuhet se shtyhet ekzekutimi i vendimit PSH.nr. 144/23 i datës 19.04.2023 i nxjerrë nga i padituri Organi Shqyrues i Prokurorimit (OSHP).
Derisa gjykata të vendosë me vendim përfundimtar gjyqësor, përkitasi me padinë e paditësit. Ky vendim është marrë nga Gjykata Komerciale, dhomat e shkallës së parë, Departamenti për Çështje Administrative nga gjyqtarja Vlora Pacolli-Rexhepi.
Në arsyetimin e këtij vendimi ndër ë tjera thuhet se gjykata vlerëson se pretendimet e paditësit të paraqitura në kërkesë janë të argumentuara me prova të besueshme, duke pasur parasysh se pretendimet e paditësit në ankesën kundër vendimit të autoritetit kontraktues (Komuna e Prishtinës), të datës 24.02.2023 nuk janë marrë parasysh dhe nuk janë elaboruar fare nga paneli shqyrtues i OSHP-së.
Gjykata, po ashtu vlerësoi se shtyerja e ekzekutimit të vendimit dhe pezullimi i aktivitetit të prokurorimit “ndërtimi i rrugës A pjesa e parë”, i iniciuar nga autoriteti kontraktues Komuna e Prishtinës, deri në shqyrtimin e pretendimeve të ngritura për shkeljet e pretenduara procedurale është më se i duhur që të ruhet interesi publik. Kjo ngase paneli shqyrtues nuk është marrur fare me pretendimin kryesor të ngritur nga ankuesi që ka të bëjë me shkelje të nenit 65 të LPP-së nga AK, duke shpërblyer me kontratë operatorin ekonomik “Sallahu shpk”, drejtori i të cilit është i dënuar për veprën penale Falsifikim i Dokumentit Zyrtar nga neni 398 paragrafi 2 të KPRK-së.
Projekti i Komunës së Prishtinës në vlerë prej mbi 8 milionë eurosh i njohur si Rruga “A”, që në fillimet e tij në procesin e tenderimit ishte shoqëruar me një varg problemesh.
