Dëmtimet, që reshjet e shiut ua bënë aparaturave të radioterapisë në Klinikën Onkologjike të QKUK-së javën e shkuar, kanë bërë që 233 pacientë nga Kosova të detyrohen ta kërkojnë trajtimin jashtë shtetit.
Ministri i Shëndetësisë, Rifat Latifi, ka thënë të enjten se MSH-ja është në bisedime me Ministrinë e Shëndetësisë së Shqipërisë që ajo t’ua ofrojë shërbimet onkologjike pacientëve nga Kosova.
Po ashtu, ai ka thënë se deri në vlerësimin e dëmeve të shkaktuara në aparatura, po bisedohet edhe me shtete të tjera të rajonit.
“Numri i pacientëve që kanë qenë në pritje dhe në trajtim është 233”, thuhet në një njoftim të MSH-së.
Deklaratat Latifi i bëri gjatë vizitës që ia bëri klinikës, pasi mori letër nga drejtori i Onkologjisë.
Të mërkurën, SHSKUK-ja njoftoi se aparatura e radioterapisë për momentin është jashtë funksionit për shkak të reshjeve të shumta atmosferike dhe depërtimit të ujit në bodrumin e Klinikës së Onkologjisë. Sipas njoftimit, ekipet e Klinikës së Onkologjisë e kanë shkyçur nga puna aparaturën me qëllim të parandalimit të pasojave të paparashikueshme.
