Ushtruesi i detyrës së drejtorit të përgjithshëm të Policisë së Kosovës, Fehmi Hoti, i shoqëruar nga drejtori departamentit të hetimeve, Arben Paçarizi dhe drejtor i drejtorisë për bashkëpunim ndërkombëtar dhe zbatim të ligjit (ILECU), Besnik Sallahu, po marrin pjesë në konferencën vjetore të shefave të policive, e cila organizohet nga EUROPOL dhe presidenca Çeke e BE-së.
Gjatë konventës, Hoti ka zhvilluar disa takime bilaterale të rëndësishme, duke u takuar me Zëvendësdrejtorin ekzekutiv për operacione të EUROPOL-it, Jean-Philippe Lecouffe, Zëvendësdrejtorin e Policisë Shqiptare, Tonin Vocaj, Drejtorin e Përgjithshëm të Policisë së Maqedonisë së Veriut, Sasho Tasevski, Drejtorin e Policisë së Kroacisë, Nikola Milina dhe Zëvendësdrejtorin e Përgjithshëm të BKA-së, Michael Kretchner.
“Gjatë këtyre takimeve u diskutuan tema mjaft të rëndësishme që ndërlidhen me fushën e sigurisë, bashkëpunimit policor në forma të ndryshme si dhe për mundësinë e shkëmbimit të eksperiencave dhe përvojave policore që mund të shërbejnë për zhvillimin profesional të organizatave policore”, thuhet në komunikatë e policisë, transmeton KosovaNews.
Konventa e shefave të policive dyditore po mbahet në selinë e EUROPOL-it në Hagë.
