Kryeministri i Kosovës, Albin Kurti dhe presidenti serb Aleksandar Vuçiq, sot do ta zhvillojnë takimin e nivelit të lartë në Bruksel në kuadër të dialogut Kosovë – Serbi të lehtësuar nga Bashkimi Evropian. Të dyja palët pritet të arrijnë pajtueshmëri për propozimin e BE-së, si një “marrëveshje bazë” për normalizimin e raporteve dhe për këtë është bërë thirrje si nga vendet e BE-së ashtu edhe nga ShBA-ja.
Ngjarjen e sotme që pritet të ndodh në Bruksel e ka komentuar edhe deputeti Haxhi Avdyli, i cili tha se në gjithë këto zhvillime sot gati të gjitha partitë opozitare, dhe argatët e tyre medial janë të gatshme e do mbajnë dy shigjeta për të goditur pas shpine kryeministrin e Kosovës.
Ai tha se shigjetat janë të gatshme si në rast se pranohet marrëveshja ashtu edhe nëse ajo refuzohet.
“Nëse pranohet plani Evropian, ku Serbia de fakto njeh Kosovën, atëherë e vetmja shigjetë që u mbeten janë marrëveshjet e turpshme që i kanë nënshkruar vetë. Nëse nuk pranohet plani Evropian, do lëshonin shigjetat e izolimit të Kosovës, prishjes me Amerikën, dhe tensionimit të situatës edhe ashtu të brishtë”, ka shkruar ai.
Deputeti Avdyli tha se krejt këto goditje do i bënin me të vetmen shpresë që ilegalisht të ulen në karrige ministrash e kryeministrash pa marrë besim qytetar, për nënshkruar më pastaj marrëveshje tjera të turpit.
“Këta për gjysmë metri karrige jo vetëm që do nënshkruanin asociacion me kompetenca ekzekutive, por edhe do falnin edhe komuna të Rankoviqit, e do bënin moratorium për mosnjohje e ku di çka do jepnin. Ata sot nëse nuk kanë kurajo patriotike që të përkrahin kryeministrin e Kosovës, se paku do bënin mirë të heshtnin kokulur duke ditur dëmet që kanë sjellë me negociatat e tyre pa krye”, ka shkruar ai.
Ai tha se personalisht është për nënshkrim të marrëveshjes evropiane për paqe mes Kosovës e Serbisë, por edhe për kërkesat maksimaliste të Kurtit për minimalizimin e efekteve te marrëveshjeve të dëmshme të nënshkruara nga ata që qytetari i dënoi me votë.
“Unë sot qëndroi fortë kundër kërkesave shovene të Vuçiqit, e në përkrahje të fuqishme për Albin Kurtin”, ka shkruar mes tjerash deputeti Haxhi Avdyli.
Kosova dhe Serbia i kanë nisur negociatat e ndërmjetësuara nga Bashkimi Evropian më 2011. Përgjatë kësaj kohe janë nënshkruar diku 33 marrëveshje, por jo të gjitha janë zbatuar.
Tani për tani të dyja vendet kanë synime të ndryshme për marrëveshjen finale. Kosova insiston në njohje reciproke, Serbia kërkon zgjidhje kompromisi.
