Ambasadori i Shteteve të Bashkuara të Amerikës në Kosovë, Jeffrey Hovenier, ka uruar kadetët e rinj të Policisë së Kosovë që diplomuan këtë të premte.
Ai është shprehur i kënaqur që kjo gjeneratë përbëhet nga përfaqësues të ndryshëm, ndërsa ka thënë se Policia e Kosovës është për t’i shërbyer të gjitha komuniteteve.
“Urimet e mia të përzemërta për kadetët e rinj të Policisë së Kosovës për ditën e diplomimit! I kënaqur të di që kjo klasë përbëhet nga përfaqësues të ndryshëm nga mbarë Kosova”.
“Policia e Kosovës ekziston për t’i shërbyer të gjitha komuniteteve në Kosovë, dhe ky është një hap tjetër drejt sigurimit të përbërjes së tyre që pasqyron Kosovën në të gjithë diversitetin e saj”, ka shkruar ambasadori amerikan në Twitter.
419 policë të rinj diplomuan të premten me një ceremoni shtetërore ku të pranishëm ishin personalitete të larta, përfshirë përfaqësues nga institucionet vendore e ndërkombëtare, familjarë të zyrtarëve policorë që diplomuan si dhe eprorë të Policisë së Kosovës.
