Viti 2022 po konsiderohet si viti më i vështirë për kryetarin e Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, pasi për më shumë se një muaj, mësimdhënësit në vend ishin në grevë.
Jasharaj ka folur për Ligjin e pagave, për të cilin ka thënë se kanë marrë zotime se i njëjti do të votohet në Kuvend në seancën që mbahet të enjten e kësaj jave.
Ai ka thënë se nëse ligji miratohet, janari mund të jetë i qetë dhe se greva e pezulluar në tetor, nuk do të vazhdojë.
“Opinioni duhet ta kuptojë qartë sepse ne nuk kemi mundur të vendosim ndryshe ngase e kishim një rezultat ndryshe, ngase e kishim një rezultat të ngushtë pro pezullimit dhe për të vazhduar grevën dhe e vetmja mundësi kur kemi situata të tilla të mos mbyllet greva, kjo nënkupton se greva mbetet si opsion i hapur dhe këtë afat e kemi lënë deri në janarin e vitit 2023. Po shkuan gjërat ashtu siç duhet po dolën të vërteta deklaratat e zonjës Nagavci dhe deputetët e bëjnë punën e tyre (e votojnë Ligjin e Pagave), atëherë në janar mund të kemi lajme të mira dhe mund të merret vendimi për mbyllje të grevës”, është shprehur Jasharaj.
Jasharaj ka thënë se versioni i dalë në medie për Ligjin e Pagave është i mirëseardhur.
Ai thotë se ka marrë zotime nga ministrja e Arsimit, Arbërie Nagavci, se Ligji është në përputhje me kërkesat e SBASHK-ut.
“T’u them të vërteten kur dol ai versioni i parë që Qeveria e mohoi, ne edhe ndaj atij versioni reaguam dhe në bashkëpunim me MAShT-in ne dërguam versionin tonë duke i thirrur ekspertët e fushës dhe dërguam mendimin tonë për koeficientin që nga çerdhet deri në universitet dhe një pjesë e kulturës është me ne dhe edhe ata dërguan komentet që ne pastaj i dërguam në MAShT, dhe kjo e fundit i mori përsipër që të punojë në një version të tyre dhe na kishin thënë se i tyri dhe i yni janë goxha të ngjashëm dhe nuk paraqiste ndonjë problem”, ka thënë Jasharaj.
Ai ka kritikuar Qeverinë e Kosovës për mungesë dialogu me ta, përkundër kërkesave për dialog.
“Së bashku me kolegë e kemi vlerësuar si vitin më të vështirë pas luftës vitin 2022, ngase që nga fillimi është vërejtur një mungesë e qasjes së duhur, gjegjësisht kemi pasur një qasje të gabuar të Qeverisë Kurti ndaj sindikatave por edhe ndaj dialogut, ngase edhe për kundër dhjetëra shkresave qoftë në emër të Bashkimit të Sindikatave të Pavarura të Kosovës, por edhe të SBASHK-ut, nuk janë përfillur kërkesat tona për dialog dhe çdo gjë e kanë vendosur ata siç kanë menduar vet, dhe më e keqja e kësaj ka ndodhur sepse nuk kishim informacione të duhura dhe na iku ai premtimi që e dha ministri Xhelal Sveçla, se në mars do ta kemi ligjin e pagave, e të cilit i besuam në deklarata, por ndodhi që nuk u bë”, ka theksuar Jasharaj.
