Këngëtarja nga Kosova Albina Kelmendi ndryshe nga siç jemi mësuar më herët në paraqitjet e saj këtë herë hyri në skenën e Festivalit të Këngës në RTSH me prindërit, motrën dhe vëllain, me këngën “Duje”.
Siç edhe pritej, Albina dhe familja e saj kanë dhuruar një performancë magjepsëse, duke treguar kështu se kënga “Duje”, është ndër favoritet kryesore për t’u shpallur fituese.
Këndimi dhe paraqitja skenike e të gjashtë anëtarëve të familjes ishte në perfeksion, duke dhuruar një ndjenjë të ngrohtë te publiku në sallë, të cilët e pritën pozitivisht këngën.
Përveç performancës, mesazh të fuqishëm dha edhe teksti i këngës, i cili flet për rëndësinë e të qenurit gjithmonë pranë familjes, duke mos harruar traditat tona se familja qëndron mbi gjithçka.
Në këtë edicion, është vendosur që kënga përfaqësuese e Shqipërisë në Eurovizion do të zgjidhet nga vetë publiku, përmes votave me SMS.
“Festivali i Këngës” vazhdon transmetimin dhe në datat 20, 21, 22 dhjetor.
