Kandidati për deputet nga Lëvizja Vetëvendosje, Glauk Konjufca, ka falënderuar qytetarët për mbështetjen e dhënë në zgjedhje, duke e cilësuar rezultatin si dëshmi të kulturës së lartë demokratike të popullit të Kosovës.
“Urime, Qeveria Kurti 4. Po e falënderoj popullin, i cili nuk u lodh kurrë duke e mbështetur LVV-në dhe kryeministrin Albin Kurti. Sot, dhe jo vetëm sot, keni treguar kulturë të lartë demokratike. Vetëm ju, duke qenë të palodhur, dhe vetëm populli di të arrijë këtë rezultat përmes votës, në mënyrë të civilizuar, në mbështetje të LVV-së. Edhe një herë, faleminderit nga zemra popullit të Kosovës. Një falënderim special për mërgatën tone dhe për policinë ”, tha Konjufca.
Sipas rezultateve preliminare të Komisionit Qendror të Zgjedhjeve (KQZ), Lëvizja Vetëvendosje ka siguruar 42.92 për qind të votave, përkatësisht 297 mijë e 286 vota. Në bazë të këtyre rezultateve, kjo parti ka dalë forca e parë politike në vend.
