Ministri i Shëndetësisë, Rifat Latifi, ka kërkuar të martën, ndihmë nga anesteziologët e pensionuar në një takim që pati me ta.
Latifi ka kërkuar nga anesteziologët e pensionuar bashkëpunim, mbështetje dhe ide kreative për ta ndihmuar fushën dhe shërbimet e anesteziologjisë bazuar edhe në përvojat e tyre akademike e profesionale.
“Ministri Latifi u tha anesteziologëve se sistemi shëndetësor i Kosovës, e sidomos Qendra Klinike Universitare e Kosovës, ka nevojë për një riorganizim të duhur, me theks te shërbimet e anesteziologjisë ku ka mungesë kuadri. Ministri Latifi, falënderoi të gjithë anesteziologët pjesëmarrës në takim, për punën e palodhshme dhe kontributin që për vite kanë dhënë në shëndetësinë e Kosovës, përfshirë këtu edhe kohërat më të vështira që i kanë kaluar ata dhe pacientët”, thuhet në një postim të MSH-së të martën.
Anesteziologët e pensionuar janë shprehur të gatshëm për të mbështetur Ministrinë e Shëndetësisë dhe për t’i shtuar angazhimet për përmirësimin e gjendjes dhe shërbimeve në shëndetësi.
Kosova është ndër vendet që i ka më së keqi punët në Evropë sa i përket numrit të anesteziologëve.
Kosova ka 118 anesteziologë në sistemin publik e privat. Me 1 milion e 800 mijë banorë, i bie që ka 6.5 anesteziologë për 100 mijë banorë. Por kjo shifër nuk mund të konsiderohet e saktë në raport me nevojat e qytetarëve. Kjo për shkak që në Kosovë nuk ka sigurime shëndetësore, e që nënkupton që të gjithë qytetarët kanë qasje të sigurt vetëm te 90 anesteziologë në të gjithë Kosovën sa punojnë në publik.
