Një nga ushqimet që shumë njerëz “urrejnë” ta duan është buka.
Ka shije kaq të mirë, por shpesh marrim këshilla që, se nga pikëpamja ushqyese është shumë e dëmshme. Ka dieta të tëra që rekomandojnë heqjen e bukës dhe karbohidrateve, dhe turpërimit të njerëzve që i hanë ato, tha Natalie Mokari, një dietologe me bazë në Charlotte, Karolina e Veriut.
“Unë shoh shumë klientë që mendojnë se nuk duhet të hanë bukë, gjë që është e trishtueshme për mua sepse buka është një burim i madh i drithërave të plota,” tha ajo.
Po, është e vërtetë: buka mund të jetë pjesë e një diete të ekuilibruar dhe karbohidratet janë vendimtare për një shëndet të mirë, shtoi dietologia.
Sipas një studimi të vitit 2017, rekomandohet të merrni dy deri në tre racione ditore me drithëra, të cilat mund të gjenden në bukë, pasi ato mund të parandalojnë diabetin e tipit 2, sëmundjet kardiovaskulare dhe kancerin kolorektal, pankreasit dhe stomakut.
“Ne kemi nevojë për karbohidrate për të funksionuar,” tha Mokari për CNN. “Kabohidratet janë ushqim për trurin. Nëse vini re, sa herë që nuk keni karbohidrate, ndiheni vërtet të plogësht, mund të keni mjegull në tru, thjesht nuk keni shumë energji.”
Nëse jeni duke kërkuar për bukën më të shëndetshme, ka shumë faktorë për t’u marrë parasysh: Si lloji që blini, çfarë hani me të dhe sa e ekuilibruar është marrëdhënia juaj me të, tha dietologia.
Buka e grurit ofron më shumë vitamina, drithëra dhe fibra, dhe ato kanë më pak ndikim negativ në sheqerin në gjak, gjë që mund të jetë e dobishme për njerëzit që kanë rezistencë ndaj insulinës, tha Mokari.
Përtej llojit të bukës, Mokari rekomandoi të shikoni se si gatuhet. Kërkoni përbërës të thjeshtë, si mielli, uji, kripa dhe tharmi, tha ajo.
“Dhe nëse është e mundur, blerja nga furrat lokale mund t’ju ndihmojë të gjeni bukë të freskët dhe cilësore me përbërës të thjeshtë”.
Dietologia këshillon se nëse jeni të shqetësuar për sheqerin në gjak, buka mund të jetë pjesë e një vakti të ekuilibruar nëse shtoni yndyrna dhe proteina të shëndetshme.
Për shembull, nëse jeni duke bërë mëngjes, provoni të kombinoni tostin me vezë, avokado ose gjalpë kikiriku, shtoi dietologia.
“Sa më shumë të kufizoni, aq më shumë do ta dëshironi atë, kështu që bëjeni një kombinim”, tha Mokari.
“Largoni këtë stigmë nga buka dhe ato ushqime të tjera me karbohidrate që janë demonizuar dhe përfshijeni atë si pjesë të një diete të ekuilibruar”.
