Ambasada britanike në Prishtinë ka lansuar “Bursën Përkujtimore Vjosa Berisha” si pjesë të programit të saj të bursave “Chevening”, nën emrin e producentes së njohur.
Çmimin nga bursa mund ta fitojnë qytetarët e Kosovës të cilët duan të studiojnë për master në Mbretërinë e Bashkuar, për Film: Menaxhimi dhe Administrimi i Arteve, Festivalit ose Kulturës; Praktikë Kreative; ose studimet e Komunikimit/Media.
Bursa i kushtohet Vjosa Berishës dhe fushat e studimit i përshtaten fushave ku ajo pati ndikim.
“Çmimi i kushtohet kujtimit dhe trashëgimisë së Vjosa Berishës dhe zgjedhja e subjekteve pasqyron gamën e fushave në të cilat Vjosa pati ndikim gjatë karrierës së saj”, thuhet në njoftimin e ambasadës.
Vjosa Berisha ka qenë fituese e bursës për një master në studimet e Medias dhe Komunikimit në Universitetin Westminster.
Ambasadori britanik Nicholas Abbott ka thënë se Berisha ka pasur ndikim të madh si producentë, ndërsa shprehu kënaqësinë për mundësinë e ofrimit të bursës për të tjerë kosovarë.
Aplikuesit në Kosovë do të mund të aplikojnë për bursën për vitin akademik 2023/2024, deri më 1 nëntor.
Vjosa Berisha vdiq më 23 qershor të këtij viti. Ajo ka pasur përvojë mbi 20 vjet në industrinë e filmit dhe ishte bashkëthemeluese dhe drejtoreshë e Festivalit “PriFest” për 11 vjet.
