Ministria e Mjedisit, Planifikimit Hapësinor dhe Infrastrukturës (MMPHI) ka refuzuar kërkesën e operatorit “Kelkos Energy” SH.P.K. për pajisje me Leje Mjedisore për hidrocentralin “Lumbardhi II” në Deçan.
Vendimi është marrë më 9 korrik 2026, pas shqyrtimit të kërkesës, takimeve dhe vizitave në terren nga Komisioni për shqyrtimin e Lejeve Mjedisore.
Sipas arsyetimit të ministrisë, gjatë inspektimit në terren janë konstatuar ndryshime të projektit krahasuar me projektin për të cilin operatori kishte marrë më herët Pëlqimin Mjedisor. Në dokument thuhet se në Raportin e Vlerësimit të Ndikimit në Mjedis ishte planifikuar ndërtimi i një rezervuari me vëllim 3.5 milionë metra kub, me mesatare të nivelit të ujit prej 20 metrash dhe nivel maksimal prej 40 metrash, ndërsa gjatë vizitës në terren është konstatuar se Zalli i Rupës, i planifikuar për ndërtimin e rezervuarit, përbën pjesë përbërëse të hidrocentralit “Lumbardhi II”.
Ministria është mbështetur edhe në dispozitat e Ligjit për Vlerësimin e Ndikimit në Mjedis, të cilat parashohin se projektet që pësojnë ndryshime ose zgjerime me ndikim të mundshëm të theksuar në mjedis duhet t’i nënshtrohen rishqyrtimit.
Për këto arsye, MMPHI ka vendosur të mos i lëshojë Lejen Mjedisore operatorit “Kelkos Energy” për hidrocentralin “Lumbardhi II”.
