Në kuadër të aktiviteteve të organizuara për shënimin e “Ditëve të Diasporës”, kryetari i Komunës së Podujevës, Shpejtim Bulliqi, dhe ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, vizituan panairin e organizuar në bulevardin e qytetit.
Gjatë vizitës, ata u njohën nga afër me produktet e ekspozuara nga pjesëmarrëset në panair, ku u prezantuan punime artizanale, veshje dhe ushqime tradicionale.
Sipas njoftimit të Komunës së Podujevës, kryetari Bulliqi përgëzoi gratë për angazhimin e tyre, duke vlerësuar se iniciativa të tilla kontribuojnë në fuqizimin ekonomik të grave dhe promovimin e trashëgimisë kulturore. Ai theksoi se institucionet lokale, në bashkëpunim me ato qendrore, do të vazhdojnë të mbështesin aktivitete që nxisin ndërmarrësinë dhe zhvillimin ekonomik.
Ndërkaq, ministrja Kusari-Lila shprehu mbështetjen për pjesëmarrëset në panair, duke i inkurajuar ato të vazhdojnë dhe të zgjerojnë aktivitetet e tyre, të cilat, sipas saj, japin një kontribut të rëndësishëm në zhvillimin ekonomik dhe social.
Panairi është pjesë e programit të aktiviteteve të organizuara nga Komuna e Podujevës në kuadër të “Ditëve të Diasporës”, me synim promovimin e produkteve vendore dhe mbështetjen e ndërmarrësisë lokale.
