Ministria e Ekonomisë ka mbajtur Konferencën e Para-Ofertimit për projektin e energjisë nga era me kapacitet 50–100 MW, duke shënuar një tjetër hap në realizimin e ankandit të parë për energjinë e erës në Kosovë.
Në konferencë morën pjesë përfaqësues të institucioneve të sektorit të energjisë, partnerëve ndërkombëtarë dhe tre ofertuesit e parakualifikuar nga Franca, Gjermania dhe Turqia, të cilët kanë kaluar me sukses fazën e kualifikimit dhe kanë avancuar në fazën e dorëzimit të propozimeve.
Ministrja në detyrë e Ekonomisë, Artane Rizvanolli, tha se konferenca synon t’u ofrojë investitorëve mundësinë për të marrë sqarime mbi aspektet teknike dhe kontraktuale të projektit.
“Ky ankand i erës, të cilin po e përmbyllim këtë verë, është ankandi i parë i erës, por që do të jetë model edhe për ankandet e ardhshme”, deklaroi Rizvanolli.
Kryesuesi i Bordit të Zyra e Rregullatorit për Energji, Ymer Fejzullahu, vlerësoi se organizimi i ankandit krijon mundësi për investime të reja dhe zhvillim ekonomik, duke e cilësuar procesin si një hap të rëndësishëm drejt transformimit të sektorit energjetik.
Ndërkaq, kryeshefi ekzekutiv i KOSTT, Trim Tërnava, tha se projekti do t’i shtojë Kosovës kapacitete të reja energjetike dhe do të forcojë sigurinë e furnizimit.
“KOSTT-i do të jetë i përkushtuar për ta mbështetur projektin brenda kornizës ligjore, duke punuar ngushtë me të gjitha palët për një proces efikas dhe transparent”, u shpreh Tërnava.
Në konferencë foli edhe përfaqësuesi i International Finance Corporation për Kosovë dhe Maqedoninë e Veriut, Visar Perani, i cili e cilësoi këtë si projektin më të madh të deritanishëm në vend në fushën e energjisë.
Sipas Ministrisë së Ekonomisë, konferenca u organizua për t’u ofruar ofertuesve të parakualifikuar sqarime mbi marrëveshjet e projektit dhe çështjet teknike, rregullative e kontraktuale, duke garantuar qasje të barabartë në informacion gjatë përgatitjes së ofertave.
Projekti mbështetet nga IFC-ja si këshilltare e transaksionit, me përkrahjen e Qeverisë së Gjermanisë dhe të Qeverisë së Luksemburgut përmes LuxDev.
Ministria thekson se mbetet e përkushtuar për zhvillimin e investimeve në burimet e ripërtëritshme të energjisë dhe për avancimin e tranzicionit energjetik në Kosovë.
