Policia e Kosovës ka dhënë detaje zyrtare lidhur me vdekjen e një 25-vjeçari në një vendpunishte ndërtimi në Prizren, ngjarje që ndodhi mëngjesin e sotëm.
Zëdhënësi i Policisë për rajonin e Prizrenit, Shaqir Bytyqi, ka konfirmuar detaje të reja lidhur me vdekjen tragjike të një 25-vjeçari në një vendpunishte ndërtimi në Prizren.
Sipas Bytyqit, sot rreth orës 09:00, Policia ka pranuar informatën se në ambulancën e lagjes Arbana në Prizren është dërguar pa shenja jete një person mashkull, rreth 25-vjeçar.
“Njësitë policore kanë dalë menjëherë në Emergjencë dhe në vendin e ngjarjes. Sipas informatave fillestare të siguruara nga dëshmitarët, dyshohet se viktima, derisa ishte duke punuar në një objekt ndërtimi, gjatë procesit të betonimit është goditur nga një pjesë e pajisjes së punës, me ç’rast ka pësuar lëndime fatale dhe ka humbur jetën në vendin e ngjarjes”, ka deklaruar Bytyqi.
Ai bëri të ditur se lidhur me rastin janë njoftuar prokurori kujdestar dhe Inspektorati i Punës, ndërsa hetimet po vazhdojnë për të sqaruar plotësisht rrethanat e ngjarjes.
“Lidhur me rastin është njoftuar prokurori kujdestar si dhe Inspektorati i Punës. Në koordinim me ta, policia është duke ndërmarrë të gjitha veprimet e nevojshme hetimore me qëllim të sqarimit të plotë të rrethanave të rastit”, ka thënë ai.
Bytyqi konfirmoi gjithashtu se me vendim të prokurorit është ndaluar një person i dyshuar.
“Deri më tani, me aktvendim të prokurorit, një i dyshuar ndalohet në ndalim policor për 48 orë”, ka deklaruar zëdhënësi i Policisë për rajonin e Prizrenit.
