Republika Çeke më 29 gusht ka thirrur një takim të jashtëzakonshëm të ministrave të energjisë të Bashkimit Evropian. Ky takim vjen mes një rritjeje të çmimeve dhe shqetësimeve për furnizimet e shkaktuara nga pushtimi i Ukrainës nga Rusia.
Ministri çek i Industrisë Jozef Sikela, vendi i të cilit aktualisht mban presidencën e radhës të bllokut, thirri takimin për 9 shtator.
Sikela tha se një zgjidhje e mundshme për të ndihmuar në lehtësimin e krizës do të ishte kufizimi i çmimit për gazin e përdorur në prodhimin e energjisë elektrike.
“Ne duhet të ndajmë çmimet e gazit nga çmimet e energjisë elektrike”, tha ai.
Blloku prej 27 vendesh ka ndërmarrë hapa për të pakësuar varësinë e tij nga importet ruse të energjisë dhe së fundmi prezantoi një plan që u bën thirrje vendeve anëtare të shkurtojnë përdorimin e gazit natyror në 15 për qind.
Plani u prezantua për t’u përgatitur për një ndalim të mundshëm të furnizimeve të gazit natyror rus, një shqetësim që është rritur me njoftimin e fundit se një tubacion kyç do të mbyllet përkohësisht për shkak të riparimit.
Roli mbizotërues i Rusisë si furnizues i energjisë për BE-në ka çuar në shqetësimet se Moska mund të kufizojë furnizimet gjatë dimrit si kundërpërgjigje ndaj sanksioneve të BE-së të vendosura për të ndëshkuar Rusinë për luftën e saj të paprovokuar kundër Ukrainës.
Sipas Komisionit Evropian, 45 miliardë metra kub gaz duhet të kursehen për të arritur objektivin gjatë shtatë muajve të ardhshëm dhe vetëm Gjermania do të duhet të konsumojë rreth 10 miliardë metra kub më pak.
Gjermania përbën rreth 40 për qind të gazit natyror rus të importuar nga Bashkimi Evropian.
Marrëveshja për zvogëlim vullnetar të përdorimit të gazit mund të bëhet e detyrueshme në rast të ndonjë emergjence.
Javët e fundit në Bashkimin Evropian janë raportuar çmime rekord të gazit natyror dhe energjisë elektrike./rel/
