Emisari i BE-së për dialogun Kosovë-Serbi, Miroslav Lajçak, ka dalë me një njoftim në Twitter sot në mëngjes pas disa bisedimeve të vështira që pati mbrëmë deri vonë me presidentin serb, Aleksandar Vuçiq.
Ai tha se vlerëson përpjekjet e Vuçiqit, por se bisedimet me të do të vazhdojnë prapë.
“Pas një rundi të dytë diskutimesh mbrëmë vonë, shpresoj se jemi në rrugën e duhur. E vlerësoj përpjekjet e sinqerta të presidentit serb për të mbështetur një zgjidhje europiane. Bisedimet tona do të vazhdojnë”, ka shkruar Lajçak.
Lajçak mbrëmë tha se diskutimi me Vuçiqin ishte i vështirë edhe pse atë e cilësoi si “të përgjegjshëm”.
“Patëm një diskutim të vështirë, por të përgjegjshëm me presidentin e Serbisë. I përcolla mesazhet dhe theksova se të gjitha marrëveshjet në dialogut duhet të zbatohen, përfshirë edhe marrëveshjen e vitit 2011 për lirinë e lëvizjes. Ne do të vazhdojmë bisedimet tona më vonë sonte”, kishte shkruar mbrëmë Lajçak.
After a second round of discussions late last night, I hope we are on the right track. I appreciate @predsednikrs sincere effort to support a European solution. Our talks will continue.
— Miroslav Lajčák (@MiroslavLajcak) August 26, 2022
Pas takimit me Vuçiqin, Escobar ka deklaruar se takimi ka qenë “i vështirë dhe i gjatë”.
“Ne vlerësojmë angazhimin e presidentit për paqen dhe stabilitetin. Do të vazhdojmë bisedimet”, tha Escobar.
Për “takim të vështirë” foli edhe presidenti serb.
“Kemi pasur biseda të vështira me Lajçakun dhe Escobarin. Aty ishin edhe ambasadorë të SHBA-së dhe ai i BE-së. Vazhdojmë sonte me bisedime pas orës 22:00”, tha Vuçiq në një video-adresim në Instagram.
“Gjithmonë do të përpiqemi të ruajmë paqen dhe stabilitetin, do të luftojmë për paqen dhe stabilitetin, por asnjë sekond nuk do të devijojmë nga interesat tona jetike, kombëtare shtetërore, mbi të gjitha interesat e popullit tonë. Nuk ka dorëzim”, tha ai.
Takimi i tyre i parë në Beograd ishte me drejtorin e Zyrës për Kosovën të Qeverisë së Serbisë, Peter Petkoviq.
Kryeministri i Kosovës, Albin Kurti përsëriti të mërkurën se do t’i përmbahet vendimit për targa dhe dokumente.
