Është shtyrë për datën 2 shtator seanca gjyqësore për rastin e hedhjes së gazit lotsjellës në hapësirat e Kuvendit të Kosovës, ndaj të akuzuarve që ishin deputetë në atë kohë, Albulena Haxhiu, Donika Kadaj dhe Pal Lekaj.
Arsye e shtyrjes ishte mungesa e të akuzuarve Pal Lekaj e Donika Kadaj, por kjo e fundit erdhi me vonesë në sallën gjyqësore.
Fillimisht e pranishme në seancë ishte vetëm, Albulena Haxhiu, deputete e zgjedhur e legjislaturës së 9-të të Kuvendit dhe njëherësh ministre në detyrë e Drejtësisë.
Ministrja në detyrë, Haxhiu e ka quajtur procesin të padrejtë, meqë thotë se veprimet e tyre atë kohë ishin politike.
“Bëhen pothuajse ndoshta 10 vite prej kur ne përballemi me një proces të padrejtë, por ja që rregullat e kërkojnë që ne jemi këtu ndonëse ne kemi seancë në orën 11:00, unë isha e pranishme. Por, në anën tjetër seanca u shty më 2 shtator. Është komplet e pakuptimtë edhe kjo zvarritje. Por, po ashtu ne akuzohemi për ‘mbajtje në pronësi’ thuajse çfarë krimi kemi bërë , ato kanë qenë veprime politike për të ndalur demarkacionin me Malin e Zi dhe po ashtu në shenjë kundërshtimi për ‘zajednicën’, por natyrisht që unë do të jem këtu derisa të përmbyllet ky proces”, tha Haxhiu para gazetarëve.
E pyetur se nëse emërohet kryeparlamentare a do t’i duronte veprimet siç i kanë bërë ata kur ishin opozitë, Haxhiu tha se e ka thënë disa herë se nëse qeveria e tyre do të bënte veprime kundër shtetit të Kosovës, kundër qytetarëve, natyrisht që veprimet opozitare, sipas saj, janë të domosdoshme, përfshirë këtu edhe gazin lotsjellës.
“Por, unë nuk besoj asnjëherë që me qeverinë tonë, me kryeministrin Albin Kurti do të ketë marrëveshje të dëmshme për vendin prandaj edhe besoj që opozita s’do të ketë nevojë për masa e veprime të tilla”, tha Haxhiu pas shtyrjes së seancës për hedhjen e gazit lotsjellës në Kuvend vite më parë.
