Në ambientet e Gjimnazit “Xhavit Ahmeti” në Gjilan, Instituti Pedagogjik i Kosovës, në bashkëpunim me Drejtorinë Komunale të Arsimit, organizoi një tryezë diskutimi me temën Avancimi i performancës së shkollës bazuar në dëshmi: përvoja dhe praktika.
Në këtë tryezë morën pjesë përfaqësues nga Instituti: Osman Buleshkaj – drejtor, Tringa Dedi – bashkëpunëtore shkencore, Bekim Morina – hulumtues i pavarur, Arbnesha Mexhuani – hulumtuese, si dhe përfaqësues nga DKA-ja në Gjilan, drejtorë dhe mësimdhënës të shkollave, pedagogë dhe koordinatorë të cilësisë.
Qëllimi i tryezës ishte forcimi i bashkëpunimit ndërmjet IPK-së, DKA-së dhe shkollave, me synim përmirësimin e performancës së shkollave, me theks të veçantë në zhvillimin e lexim-kuptimit dhe lexim-shkrimit, si dhe zbatimin e sistemit të licencimit dhe vlerësimit të performancës së mësimdhënësve.
Tryeza shërbeu si platformë për ndarjen e praktikave të mira, identifikimin e sfidave dhe zhvillimin e qasjeve të përbashkëta, të bazuara në të dhëna dhe përvoja konkrete nga terreni.
Temat kryesore të diskutimit:
Strategjitë dhe metodat e mësimdhënies me fokus në lexim-kuptim dhe lexim-shkrim;
Planifikimi zhvillimor dhe vlerësimi i performancës së shkollës;
Licencimi dhe vlerësimi i performancës së mësimdhënësve;
Zhvillimi profesional me bazë në shkollë.
Në sesionin hyrës, pjesëmarrësit u përshëndetën nga shefi i arsimit në Komunën e Gjilanit dhe drejtori i IPK-së, z. Osman Buleshkaj.
Z. Bekim Morina prezantoi gjetjet dhe rekomandimet e dala nga hulumtimi me temën “Qasja metodike e mësimdhënësve për zhvillimin e lexim-kuptimit te nxënësit.” Ai theksoi se, bazuar në këto rekomandime, IPK-ja ka planifikuar hartimin e një udhëzuesi për lexim-kuptim, shkrim-lexim dhe mendim kritik e kreativ, si dhe zhvillimin e moduleve të trajnimit për mësimdhënësit.
Ndërkohë, z. Osman Buleshkaj foli për procesin e licencimit, vlerësimin e brendshëm të mësimdhënësve dhe zhvillimin e tyre profesional, duke theksuar rëndësinë e mbështetjes së vazhdueshme të ekipeve në kuadër të shkollës.
Znj. Tringa Dedi prezantoi disa nga aktivitetet e planifikuara për vitin shkollor 2025/2026, përfshirë temat për bashkëpunim dhe programet e trajnimeve që do të ofrojë IPK-ja për shkollat.
Pjesëmarrësit ndanë përvoja të vlefshme dhe diskutuan mbi sfidat aktuale dhe mundësitë për përmirësimin e cilësisë në arsim, përmes qasjeve të koordinuara dhe mbështetjes së ndërsjellë.
Në përmbyllje, përfaqësuesit e IPK-së dhe DKA-së nënvizuan rëndësinë e vazhdimit të bashkëpunimit dhe ndërtimit të kapaciteteve të qëndrueshme për të mbështetur shkollat në përmbushjen e standardeve të cilësisë.
Sipas oraganizatorëve, gjatë javeve në vazhdim tryeza do të zhvillohen edhe me komunat e tjera, për të diskutat tema të tjera me rëndësi për arsimin parauniversitar.
