Kryeministri i Kosovës Albin Kurti, ka thënë se konvertimi i targave të automjeteve nga “PR”, “PZ” “KM” i shërben sigurisë së vendit.
Kurti në mbledhjen e qeverisë tha se qytetarët serbë do të mund të përfitojnë lirime nga taksat që kapin shumën e rreth 5 mijë eurove.
“Konvertimi i targave të automjeteve nga ato ilegale në ato RKS i shërben rendit dhe ligjit, sigurisë publike në gjithë republikën tonë. Duke i kontribuar këtyre qëllimeve mund të përfitohet nga lirimi i taksave doganore, taksa administrative, tarifa për targën dhe tarifa për pajisjen me cerifikatë të regjistrimit të mjetit që në vlerë totale kapin shifrën rreth 5 mijë eurosh” – tha Kurti.
Qeveria e Kosovës me kërkesë të ambasadorit të Shteteve të Bashkuara të Amerikës Jeff Hovenier, e ka pezulluar vendimin për zbatimin e reciprocitetit me Serbinë për targat e veturave dhe dokumentet e identifikimit, si shkak i tensionimit të situatës në veri dhe vendosjes së barrikadave nga serbët.
Sot, kryeminsitri i Kosovës Albin Kurti iu ka bërë thirrje të gjithë qytetarëve serbë që t’i konvertojnë targat në RKS.
Kurti ditë më parë gjatë një interviste për gazetën italiane “La Republicca” ka thënë se qytetarët serbë kanë kohë dy muaj që t’i ndërrojnë targat.
Qeveria e Kosovës është zotuar se zbatimi i masës së reciprocitetit do të nis nga 1 shtatori.
