Oda e Arkitektëve të Republikës së Kosovës ka shprehur shqetësimin dhe dhimbjen e thellë për dy ngjarjet tragjike të ndodhura së fundmi në lagjen Veternik, ku humbi jetën një punëtor ndërtimi dhe u shemb dheu në një kantier tjetër, duke lënduar disa persona, përcjell KosovaNews.
Në një deklaratë për media, Oda e Arkitektëve thekson se këto aksidente të përsëritura janë tregues alarmantë të mungesës së sigurisë në sektorin e ndërtimit, duke e cilësuar atë si një nga sektorët me risk më të lartë për jetën e punëtorëve.
“Humbja e jetës dhe rrezikimi fizik nuk duhet të konsiderohen kosto të pranueshme të punës,” thuhet në deklaratë.
Oda ka shprehur ngushëllimet më të sinqerta për familjen e punëtorit të ndjerë dhe solidaritet me të lënduarit dhe familjet e tyre, duke e konsideruar këtë një thirrje të fortë për përgjegjësi dhe rishikim rrënjësor të menaxhimit të sigurisë në ndërtimtari.
Në deklaratë, Oda e Arkitektëve kërkon nga organet kompetente:
Hetimin transparent dhe të përgjegjshëm të rrethanave të këtyre ngjarjeve.
Rritjen e ndjeshme të prezencës dhe kontrollit të Inspektoratit të Punës në kantierë, me veprime të pakompromis ndaj shkeljeve të standardeve të sigurisë.
Trajtimin e sigurisë si prioritet absolut nga kompanitë ndërtuese, përmes zbatimit të masave mbrojtëse dhe trajnimeve të vazhdueshme për punëtorët.
Rritjen e përgjegjësisë dhe mbikëqyrjes profesionale në të gjitha hallkat e zinxhirit ndërtimor.
Oda u ka bërë thirrje edhe punëtorëve të ndërgjegjësohen dhe të kërkojnë kushte të sigurta pune dhe trajnime profesionale, duke theksuar se siguria është e drejtë bazë dhe detyrim ligjor e moral, jo privilegj.
“Oda e Arkitektëve të Kosovës mbetet e përkushtuar të kontribuojë përmes mekanizmave të saj në ngritjen e kulturës së sigurisë, edukimit profesional dhe bashkëpunimit me institucionet përkatëse, në mënyrë që tragjedi të tilla të mos përsëriten,” përfundon deklarata./KosovaNews/
Lexo po ashtu:
