Sekretari i Lëvizjes Vetëvendosje, Alim Rama, ka reaguar ndaj shpalljes së pavlefshme të qindra fletëvotimeve nga numëruesit e Qendrës së Numërimit dhe Resultateve (QNR), duke e cilësuar këtë veprim si të pabazuar dhe të padrejtë. Sipas tij, këto fletëvotime janë shpallur të pavlefshme për arsye të pabaza, sepse qytetarët nuk i kanë shtypur ato ashtu siç parashikohet nga rregulloret, pavarësisht se qëllimi i votuesve është i qartë dhe i pakontestueshëm.
Rama theksoi se Rregullorja Zgjedhore e KQZ-së (NR. 12/2024) e përcakton qartë se një votë është e vlefshme kur votohet vetëm një subjekt politik dhe qëllimi i votuesit është i dukshëm. Ai shtoi se në këto fletëvotime figuron vetëm një subjekt politik, duke i dhënë legjitimitet dhe vlefshmëri votës.
“Përpjekjet për të shpallur këto fletëvotime të pavlefshme janë të papranueshme dhe të dëmshme për demokracinë. Qëllimi i qytetarëve është i qartë dhe çdo tentativë për t’i manipuluar ato është një shkelje e rëndë e vullnetit të qytetarëve të Kosovës, veçanërisht atyre që jetojnë në mërgatë,” tha Rama.
Ai po ashtu nënvizoi se Lëvizja Vetëvendosje ka dorëzuar një ankesë në Panelin Zgjedhor për Ankesa dhe Parashtresa (PZAP), pasi konsideron se KQZ-ja nuk ka qenë e gatshme të korrigjojë këtë shkelje të ligjit për arsye krejtësisht politike.
“Çdo përpjekje për të manipuluar vullnetin qytetar është një cenim i thellë i demokracisë,” përfundoi Rama.
Ky reagim vjen në një kohë kur shumë qytetarë të Kosovës janë të shqetësuar për transparencën dhe procesin e numërimit të fletëvotimeve, dhe Lëvizja Vetëvendosje po kërkon korrigjimin e kësaj situate për të siguruar një proces zgjedhor të ndershëm dhe të drejtë.
