Ministrja e Arsimit, Shkencës, Teknologjisë dhe Inovacionit, Arbërie Nagavci së bashku me shefen e kabinetit, Bora Shpuza, vizituan sot Muzeun “Çast”, në kuadër të Fondacionit Jahjaga, një organizatë joqeveritare e themeluar nga ish-presidentja e Kosovës, Atifete Jahjaga.
Muzeu “Çast” synon të hedhë dritë mbi historitë personale dhe artefaktet e të mbijetuarve, duke theksuar ndikimin afatgjatë të dhunës seksuale tek individët dhe shoqëria.
Ministrja Nagavci shprehu mbështetjen e saj të plotë për iniciativën e Muzeut “Çast”, që është shumë e rëndësishme për të promovuar drejtësinë dhe për të ndihmuar në sigurimin e një paqeje të qëndrueshme për të mbijetuarit e dhunës seksuale gjatë luftës.
Ndërsa, themeluesja e Fondacionit Jahjaga, Atifete Jahjaga, e falënderoi ministren Nagavci për vizitën e saj dhe e vlerësoi mbështetjen për avancimin e shoqërisë kosovare dhe për përballje me të kaluarën.
