Pas vendimit për shpalljen e gjendjes së jashtëzakonshme në dy njësi, ndërmarrja “Trepça” ka dalë me një sqarim, duke thënë se vendimi ka ardhur për shkak se ndërmarrja po mobilizohet për stabilizim dhe rimëkëmbje.
“Vendimi parasheh mobilizimin e të gjitha kapaciteteve për të stabilizuar gjendjen operative dhe financiare të ndërmarrjes. Gjatë pjesës së mbetur të vitit, ndërmarrja synon rritjen e prodhimit dhe kufizimin e shpenzimeve sipas një plani të veprimit të miratuar nga Bordi Mbikëqyrës. Për këtë qëllim janë intensifikuar punët në minierë dhe flotacion dhe janë pezulluar pushimet vjetore për muajt shtator–nëntor”, thuhet në reagim.
Tutje “Trepça” rikujton se ndërmarrja është përballur sivjet me vështirësi financiare dhe operative, duke theksuar se rrezikohet nga përmbarimi i borxheve të trashëguara në vlerë prej mbi 3 milionë euro.
“Qeveria e Republikës së Kosovës ka ndarë mbi 8 milionë euro për ta mbështetur ndërmarrjen gjatë vitit 2024”, përfundon reagimi.
