Me rastin e 7 marsit – Ditën e Mësuesit, presidentja e Kosovës, Vjosa Osmani e ka vizituar mësuesën e saj.
Në njoftim thuhet se mësuesja Xhevahire ka triumfuar në një nga betejat më të vështira jetësore, duke mposhtur dy herë kancerin.
“Pavarësisht kësaj, me forcë, guxim dhe angazhim të jashtëzakonshëm, ajo vazhdon të lërë gjurmë të pashlyeshme në punën e çdoditshme me brezin e ri”, thuhet në njoftim.
Tutje thuhet se dija është rruga më e sigurt për të ardhmen dhe mirëqenien.
Ministrja e Arsimit, Shkencës, Teknologjisë dhe Inovacionit (MAShTI), Arbërie Nagavci, në nder të ditës së mësuesit, 7 Marsit, ka falënderuar mësimdhënësit për përkushtimin e tyre në arsim.
“Në këtë ditë të rëndësishme, ju falënderoj për punën dhe përkushtimin tuaj në arsimimin e brezave të rinj. Roli juaj në procesin edukativo-arsimor është shumë i rëndësishëm për zhvillimin e përgjithshëm të shoqërisë”, ka shkruar Nagavci.
Nagavci ka thënë se prioritet i MAShTI-t është të përmirësojnë cilësinë në arsim, duke rregulluar infrastrukturën ligjore dhe fizike.
