Ministrja e Drejtësisë, Albulena Haxhiu, ka thënë se që nga fillimi i marrjes së detyrës së saj si ministre, tre vjet më parë, sfidën më të madhe e ka pasur jetësimin e zotimit për reformë në drejtësi. Sipas saj, pengesë kanë qenë institucionet e drejtësisë.
Në konferencën për media të mërkurën, Haxhiu ka marrë si shembull procesin e vettingut, që ka kaluar testin e Gjykatës Kushtetuese.
“Prej momentit kur kam pranuar detyrën, sfida më e madhe ka qenë jetësimi i reformës në drejtësi. Kemi pasur mbështetje shumë të madhe të qytetarëve për të jetësuar reformën në drejtësi. E dini vetë ju sa kanë nevojë për drejtësi dhe sa shumë e duan atë. Sa shumë duan që Kosova të jetë shtet i së drejtës. Kemi pasur vullnetin tonë të hekurt për të vazhduar sipas zotimeve që kemi dhënë para qytetarëve, por në anën tjetër jemi përballur me pengesat e vazhdueshme nga institucionet e drejtësisë sepse siç jeni në dijeni edhe përkundër që kemi aktgjykim të Gjykatës Kushtetuese për vettingun në sistemin e drejtësisë, ende institucionet e drejtësisë konsiderojnë që nuk ka nevojë Kosova për vetting që do të verifikonte integritetin e gjyqtarëve dhe prokurorëve”, ka thënë ajo.
Haxhiu është ankuar edhe në vonesat e Gjykatës Kushtetuese për të marrë vendime. Sipas saj, ky institucion “nuk e ka ndjeshmërinë e njëjtë siç e kanë qytetarët për nevojën që të jetësohet se a më parë vettingu në drejtësi”.
Sfida të tjera për drejtësinë i ka parë edhe Kodin Civil dhe Strategjinë për Drejtësinë Transicionale.
