Në mbledhjen 33-të në vitin 2023 të Komisionit Qendror të Zgjedhjeve që u mbajt sot (e mërkure), partia politike “Srpska Demokratija” është regjistruar zyrtarisht në Republikën e Kosovës.
Në këtë mbledhje gjithashtu u tha se Agjencia e Statistikave të Kosovës me 29 nëntor të këtij viti ka kërkuar nga KQZ-ja rreth 700 kuti të votimit të cilat do të përdoren për Regjistrimin e Popullsisë Ekonomive Familjare dhe Banesave (REKOS).
Besnik Buzhala nga Zyra e Partive Politike, tha se pas pranimit të aplikacionit zyra ka shqyrtuar këto dokumente dhe lista e nënshkrimeve është verifikuar edhe nga sekretari i KQZ-së , ku partia ka paguar edhe taksën për regjistrim. Të gjithë votuan pro për pranimin e kësaj partie politike.
“Pas pranimit të aplikacionit, Zyra ka shqyrtuar këto dokumente të cilat me kërkesat e zyrës janë plotësuar me statutin dhe lista e nënshkrimeve është verifikuar edhe nga sekretariati i KQZ-së, gjithashtu iniciativa politike ka realizuar edhe pagesën e taksës për regjistrim ku partia politike ka paguar edhe taksën për regjistrim. Pas plotësimit të këtyre dokumenteve, zyra ka shpallur kërkesën për shqyrtim publik në ueb-faqen e KQZ-së e cila ka qenë e mbajtur prej datës 29 nëntor 2023 deri me datën 5 dhjetor. Andaj pas i gjithë dokumentacioni i dorëzuar është nën përputhje me nenin 13, zyra ia rekomandon KQZ-së aprovimin e kërkesës për regjistrimin e iniciativës politike si parti politike me emrin “ Srpska Demokratija” tha ai, raporton KP.
Valmir Elezi zëdhënësi i KQZ-së tha në një deklaratë se ka pranuar 4 e-maile nga disa qytetarë me kërkesë të largimit të kryetarit të 4 komunave veriore. Ai tha se përgjigjen qytetarët do ta marrin shumë shpejt duke u bërë e ditur edhe publikisht.
“Ashtu siç iu kemi njoftuar gjatë ditës së djeshme, në disa adresa zyrtare, kemi pranuar katër e-maile, të cilat kanë pasur të bashkëngjitur të plotësuar formularin për inicimin e kërkesës për largimin e kryetarit të komunës nga funksioni. Mund t’iu konfirmoj se këto shkresa janë duke u shqyrtuar dhe duke u përgatitur përgjigjja për to. Në një kohë sa më të shpejtë do t’iu dërgohet atyre personave apo qytetarëve dhe sigurisht se për përgjigjen do të bëhet e ditur edhe publikisht,” u shpreh Elezi.
Në rend të propozuar të ditës ishte shqyrtimi dhe votimi i dy proces verbaleve 31 dhe 32 , aktivitete të zyrës, raportet e këshillëve, të cilat u miratuan.
