Antropologu mjekoligjor Dr. Valon Hyseni dhe Udhëheqësi i Njësisë së Komisionit Qeveritar për Persona të Zhdukur, Kushtrim Gara, morën pjesë në takimin e ‘Grupit Rajonal për zgjidhjen e rasteve NN (mbetjet mortore të paidentifikuara)’.
Diskutimi përfshiu mundësinë e nominimit të ‘rasteve me interes të përbashkët’ dhe shkëmbimin e përvojave në adresimin e sfidave të përbashkëta.
Komisioni Qeveritar i Kosovës prezantoi punën në procesin e ‘ri-inventarizimit’ të rasteve të mbetjeve mortore, duke përfshirë identifikime të reja nga laboratorët ndërkombëtarë.
Gjatë takimit, u diskutua edhe për mbetjet mortore të të paktën tre personave të luftërave në ish Jugosllavi.
“Përfaqësuesit e Komisionit Qeveritar të Republikës së Kosovës për Persona të Zhdukur, gjatë takimit, ndër të tjera kanë prezantuar punën që është duke u bërë në procesin e ‘ri-inventarizimit , përkatësisht rishqyrtimit të hollësishëm të të gjitha rasteve të mbetjeve mortore që vazhdojnë të jenë si të paidentifikuara në morgun e Institutit të Mjekësisë Ligjore’, proces ky i filluar në Nëntor të viti 2021. Duke vë theksin në rezultatet e arritura përfshirë edhe 16 identifikimet ( 11 identifikime të reja dhe 5 raste për konfirmim identiteti) nga procesi i ri-inventarizimit apo nga mostrat që ishin në proces të testimit në laboratorët e Komisionit Ndërkombëtar për Personat e Zhdukur (ICMP).
Po ashtu gjatë takimit janë diskutuar edhe rastet e të paktën tre personave, viktima të luftërave tjera në ish Jugosllavi, mbetjet mortore (eshtrat) e të cilëve mund të jenë si të paidentifikuara në morgjet e shteteve tjera të rajonit. Rrjedhimisht në ditët në vijim do të intensifikohet bashkëpunimi me familjet e këtyre viktimave dhe shoqatat familjare edhe në mundësinë e mbledhjes së mostrave referuese biologjike (mostrave të gjakut) sipas rekomandimeve nga ana e ekspertëve dhe vlerësimeve paraprake nga Komisioni”, thuhet në njoftim.
Në takimin e bashkëkryesuar nga përfaqësuesit e ICMP-së dhe përfaqësuesit e Institutit të Bosnjë e Hercegovinës për Personat e Zhdukur , pjesëmarrës ishin përfaqësuesit e Komisionit Qeveritar të Republikës së Kosovës për Personat e Zhdukur , Drejtorisë për Personat e Zhdukur të Luftës Atdhetare të Republikës së Kroacisë, Komisionit Qeveritar të Malit të Zi për Persona të Zhdukur dhe Komisionit të Serbisë për Persona të Zhdukur.
