Avokati kosovar Tomë Gashi ka reaguar pas vendimit të Gjykatës Speciale që të akuzuarve Hashim Thaçit, Kadri Veselit dhe Rexhep Selimit t’iu pezullohen përkohësisht çdo komunikim.
Ky vendim që u mor kundër ish- krerëve të UÇK-së që po mbahen në Hagë, për avokatin kosovar është edhe për shkak të dështimit në punën e tyre të personave që po paguhen me miliona euro.
“Dështim katastrofal i avokatëve brilant, të paguar rreth 20 milionë euro nga Qeveria e Kosovës, e që, deri në përfundim të rasteve, do t’i kushtojnë buxhetit të Kosovës edhe shumë më shumë se 20 milionë euro”, ka thënë në reagimin e tij avokati Gashi.
Ai thon se avokatët e angazhuar në këtë proces, përveç se t’i mbrojnë, duhet edhe t’i këshillojnë klientët e tyre.
Ndalimi i vizitave në Hagë erdhi pasi Prokuroria incizoi bisedat në Qendrën e Paraburgimit dhe pretendon se Thaçi, Veseli e Selimi u zbuluan vizitorëve detaje për dëshmitarë.
Specialja të enjten, 23 nëntor, bëri të ditur vendimin e përkohshëm teksa u bë e ditur se ky vendim u mor pas kërkesës së Zyrës së Prokurorit të Specializuar që tha të akuzuarit kanë shkelur urdhrat e trupit gjykues, duke zbuluar identitetin e dëshmitarëve të mbrojtur dhe/ose shpërndarjen e përmbajtjes së dëshmisë konfidenciale.
