Vetëm pak minuta pasi presidentja Vjosa Osmani dha arsyet pse ka refuzuar dekretimin e Blerim Isufajt për kryeprokuror të shtetit, ka reaguar Ehat Miftaraj nga Instituti i Kosovës për Drejtësi (IKD)
Ai shkroi në rrjetin social Facebook se vendimi i Osmanit është në linjë me qëndrimet e shprehura nga organizatat joqeveritare, ambasadat, Zyra e Bashkimit Evropian në Prishtinë dhe Komisioni Evropian.
“Këshilli Prokurorial ka dështuar të udhëheqë një proces të bazuar në meritokraci dhe integritet”, shkroi ai.
Reagimi i plotë nga Ehat Miftaraj:
Vendimi i Presidentes Osmani në linjë të njëjtë me qëndrimet e organizatave jo qeveritare, reagimet e ambasadave, Zyrës së Bashkimit Evropian dhe Komisionit Evropian.
Këshilli Prokurorial ka dështuar të udhëheq një proces të bazuar në meritokraci dhe me integritet.
Nuk është hera e parë që Këshilli dështon në procese të tilla. Njëjtë kishte vepruar edhe me emërimin e Kryeprokurorit të PSRK dhe Prokurorisë Themelore në Prishtinë. Njëjte kishin reaguar ambasadat e huaja, organizatat jo-qeveritare, ZBE dhe Komisioni Evropian, duke i kontestuar këto procese dhe duke kritikuar Kosovën për gjendjen në sistemin prokurorial.
Sot duhet përgëzuar Presidenten për lidership dhe vendim marrje të bazuar në Kushtetutë, ligj dhe praktikën e ndërtuar nga Gjykata kushtetuese.
Sot duhet kërkuar llogari dhe përgjegjësi tek Këshilli Prokurorial pse po dështon vazhdimisht të siguroj meritokraci dhe integritet në procese të rëndësishme të emërimeve të larta në sistemin prokurorial.
Këshilli Prokurorial duhet të zhvillojë një proces të ri i cili proces duhet të filloj përmes ndryshimit të Rregullores dhe dokumenteve përcjellëse dhe të siguroj një proces të pavarur, të drejtë të bazuar në meritokraci dhe me integritet.
