Ministri i Shëndetësisë, Arben Vitia i konsideroi si shtylla të sistemit shëndetësor odat e profesionistëve, me të cilat premtoi bashkëpunim të ngushtë në rritjen e cilësisë për qytetarët. Këto komente Vitia i bëri gjatë një takimi me përfaqësuesit e Odës së Stomatologëve të Kosovës, Blerim Kamberin dhe Ali Gashin.
Temë kryesore e këtij takimi ishte thellimi i bashkëpunimit me qëllim të rritjes së cilësisë së shërbimeve stomatologjike, si dhe hartimit të dokumenteve strategjike dhe zhvillimore, njofton MSH.
“Bashkëpunimi ynë siguron rritje të cilësisë së shërbimeve shëndetësore. Qëllimet tona janë të përbashkëta në shërbim të qytetarëve dhe thellimi i bashkëpunimit është shumë i rëndësishëm”, tha ministri Vitia.
Ndërsa, kryetari i Odës së Stomatologëve të Kosovës prezantoi para ministrit planet dhe objektivat e punës së tyre.
Gjatë këtij takimi u vlerësua domosdoshmëria urgjente e hartimit të dokumenteve strategjike, ndërsa të pranishmit u dakorduan që të themelohen grupet punuese të përbashkëta për hartimin e tyre.
