Deputeti i Lëvizjes Vetëvendosje, Artan Abrashi, ka thënë se Partia Demokratike e Kosovës “nuk e ka braktisur vrasjen si mjet ndaj kundërshtarëve të vet”.
Në një reagim pas shkrimit të ushtruesit të detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK), Faton Klinaku, se “më parë do ta vriste kryeministrin Albin Kurti sesa që do t’ia lëshonte rrugën e të ikte nga Kosova”, Abrashi ka thënë se Klinaku është “mbështetës i hapur i PDK-së”.
“Faton Klinaku ka qenë çdoherë konsistent. Vazhdimisht ka deklaruar dhe deklaron mbështetjen e tij të hapur ndaj PDK-së. Përherë ka vepruar dhe vepron në koordinim të hapur me agjendën politike të PDK-së. OVL në krye me të ishte dhe është instrument politik i PDK-së. Faton Klinaku është ndërgjegjja e kulluar e PDK-së, instinkti i saj pa mbulesën e gjuhës së matur. Pse ndër mijëra fjalë për të ilustruar një mendim, ai zgjedhi pikërisht fjalën vrasje? Kjo fletë shumë. Është dëshmia e qartë se PDK në regjistrin e saj të metodave ende nuk e ka braktisur vrasjen si mjet ndaj kundërshtarëve të vet”, ka shkruar Abrashi në Facebook.
Për postimin e së martës, Klinaku është intervistuar nga Policia e Kosovës. Avokati i tij ka thënë se shkrimi në Facebook është “nxjerrë nga konteksti”.
