Ushtruesit i detyrës së kryetarit të OVL-UÇK-së, Faton Klinaku, është intervistuar pas deklaratës së djeshme ku përmedni vrasjen e kryeministrit të vendit, Albin Kurti.
Lajmin e ka konfirmuar avokati i Klinakut, Ramë Dreshaj, i cili tha se intervistimi ka zgjatur 1 orë.
“Po është intervistuar, Prokuroria i ka udhëzuar hetuesit policorë dhe ata e kanë intervistuar”, ka thënë Dreshaj.
Klinaku dje kishte shkruar në Facebook një komunikim, sipas tij me një votues të Lëvizjes Vetëvendosje.
Sipas tij, votuesi ka thënë se Kurti nuk ka bërë ndryshim, përkundrazi “po shkojmë edhe më shumë teposhtë si vend dhe s’ka mbetur tjetër gjë pos me ikë jashtë”.
“I thashë: As se kam votu, as ndryshim për të mirë kurrsesi që nuk kam pritur nga ai, e sa i përket daljes jashtë, më parë e vras Albin Kurtin sesa që ia lëshoj rrugën e iku nga Kosova”, ka shkruar Klinaku.
Ndaj kësaj deklarata ka pasur reagime të shumta, ndërsa edhe një pjesë e veteranëve janë distancuar nga Klinaku dhe janë vënë në mbështetje të institucioneve të Republikës së Kosovës.
Edhe zëvendësministri i Ministrisë së Mjedisit, Planifikimit Hapësinor dhe Infrastrukturës, Avni Zogiani i ka reaguar Klinakut, duke thënë se tashmë i janë ndalur përfitimet dhe për shkak i janë terru sytë e lëshon deklarata të tilla.
“20 milionë euro të rezervave financiare të shtetit qen shpërndarë pa kurrfarë kriteri nga Qeveria Haradinaj! Ndër të tjera aty pat marrur edhe organizata e Klinakut! Epo s’ka ma kështu, prandaj i janë terru sytë këtij dhe plotë të tjerëve si ky”, ka shkruar Zogiani.
Kurse Lëvizja për Demokraci në reagimin e saj thotë se Faton Klinaku duhet te arrestohet menjëherë pas deklaratës skandaloze ku e përmend vrasjen e Albin Kurtit!
“Është një shembull i papranueshëm i përdorimit të retorikës së ekstremizmit në politikë. Në një kohë kur Kosova ka nevojë për bashkëpunim, dialog dhe për të ndërtuar një të ardhme të qetë dhe të sigurt, kjo lloj retorike nuk kontribuon në asnjë mënyrë pozitive, por nxit urrejtje dhe vrasje në mes vete”, thuhet në reagimin e Lëvizjes për Demokraci.