Dje, me datë 17 qershor 2023, në orët e pasditës, pas një aksidenti në komunikacion, një veturë me targa të Republikës së Kosovës ka humbur drejtimin dhe ka përfunduar në lumin Lepenc. Në veturë ndodheshin katër pjesëtarë të një familjeje nga Kosova. Njëri prej tyre ka arritur që të dalë nga lumi Lepenc, përderisa të tjerët janë në kërkim.
Në vendngjarje ka dalë Ministri Sveçla bashkë me Ambasadorin Qehaja, të shoqëruar nga zëvendës Ministri i Brendshëm i RMV Bushi.
Ministria e Punëve të Jashtme dhe Diasporës, respektivisht Ambasada e Republikës së Kosovës në Maqedoninë e Veriut njofton se përmes lehtësimit të procedurave të përshpejtuara ka bërë të mundur kalimin e njësiteve të specializuara të kërkim-shpëtimit nga Kosova për në territorin e RMV-së, pas kërkesës së autoriteteve maqedonase.
“Krahas ekipeve të specializuara të Maqedonisë së Veriut, që në orët e hershme të mëngjesit pjesë e operacionit të kërkim-shpëtimit janë njësiti relevant nga FSK dhe ai nga Policia e Kosovës.
Për shkak të reshjeve të shumta të ditëve të kaluara, operacioni është duke u realizuar me disa vështirësi por pa epilog deri më tani. MPJD do t’ju mbajë të informuar rreth zhvillimeve të mëtejme”, thuhet nga Ambasada e Republikës së Kosovës në Maqedoninë e Veriut.
Deri sa ende wshtë duke vazhduar kërkimi për tre personat e zhdukur në lumin Lepenc afër fshatit Orman të Shkupit edhe anëtarët e Shoqatës së Kosovës për Kërkim dhe Shpëtim janë nisur drejt Maqedonisë së Veriut .
Sipas njoftimit të kësaj shoqate, bëhet fjalë për tre anëtarë të familjes Pacolli.
“Anëtarët e Shoqata e Kosovës për Kërkim dhe Shpëtim janë nisur drejt Maqedonisë Veriore për kërkimin e familjes Pacollit të rënë në lumin Lepenc ditën e djeshme”, thuhet në njoftim.
