Prokuroria Themelore e Mitrovicës ka nisur hetimet ndaj pronarit të kompanisë “Beni Dona Plast” Ragip Mustafa i njohur ndryshe si Ragip “Zhaba”, i cili njëherit është edhe anëtar i Këshillit të Përgjithshëm të LDK-së.
Në kohën kur Policia e Kosovës po përballej me situatë të tensionuar në veri, nga grupet kriminale serbe, kompanisë “Beni Dona” i sekuestrohen me mijëra copë jogurt, peshk, krem e qumësht me afat të skaduar, në kampin e Njësisë Speciale “Belvedere” në Mitrovicë.
Ky konfiskim erdhi pasi që dyshohej se kjo kompani ka vënë në qarkullim artikuj te dëmshëm ushqimor pas datës së skadimit, madje duke e ditur se janë të dëmshme për shëndetin e njeriut.
Në këtë mënyrë, atë kohë disa pjesëtarë të Policisë së Kosovës edhe ishin helmuar.
Gjetjet skandaloze nga raportet e AVUK-it, Inspektoratit Sanitar, dhe IKSHPK
Policët e Njësisë Speciale në Veri helmohen nga konsumimi i ushqimit të kompanisë “Beni Dona” kishin simptoma të fryrjes së barkut dhe barkqitje, nuk mund të bënin kontrolle mjekësore për shkak të situatës së tensionuar. Mostrat e mishit dërgohen për analiza në IKSHPK dhe dalin pozitive me përmbajtje të bakterieve të rrezikshme.
Për këtë shkak pas marrjes ë rezultateve ku dëshmohej se ushqimet ishin pa afat dhe jo sipas kritereve, Policia e Kosovës në dhjetor të vitit të kaluar kishte ngritur kallëzim penal ndaj Mustafës.
E tash pas gati katër muajsh të kallëzimit penal, Prokuroria Themelore e Mitrovicës pohon se kanë nisur hetimet ndaj pronarit të kompanisë “Beni Dona Plast”, Ragip Mustafa.
Hetimet kanë nisur nën dyshimin se nga personi në fjalë apo kompania e tij, janë kryer së paku dy vepra penale sipas Kodit Penal të Republikës së Kosovës.
“Rasti është inicuar për shkak të dyshimit për kryerjen e veprave penale nga neni 415 dhe 261 të Kodit Penal të Republikës së Kosovës. Rasti është në proces”, thuhet në një përgjigje për KosovaNews nga Prokuroria Themelore e Mitrovicës.
Me kallëzimin penal të Policisë, Ragip Mustafa akuzohet për dy vepra penale dhe tashmë hetohet nga Prokuroria për “Prodhimin dhe vënien në qarkullim të artikujve të dëmshëm ushqimor” i sanksionuar nga neni 261 dhe Keqpërdorim dhe Mashtrim në Prokurimin Publik nga neni 415 te KPRK”.
KosovaNews pati shkruar kohë më parë për kallëzimin penal prej 7 faqesh nga Njësia për Hetimin e Krimeve Ekonomike dhe Korrupsion ne Mitrovice Jug, bërë në Prokurorinë Themelore në Mitrovicë.
Ne fillim të këtij kallëzimi penal Ragip Mustafa përshkruhet si person me të kaluar kriminale ku mbi të rëndojnë 5 raste të dyshimta.
Ndryshe Kompania “Beni Dona Plast” ka për pronar Ragip Mustafën i cili njihet si njeri i afërt me Agim Veliun dhe ish-kryeministrin Isa Mustafa. Kjo kompani është njëra ndër ato që ka përfituar tender publik me dhjetëra miliona euro që nga paslufta.
LEXO detajet në linkun më poshtë”