Gjykata Themelore në Prizren ka shpallur aktgjykim dënues ndaj të akuzuarit Sh.H., duke e shpallur fajtor për dy vepra penale të vjedhjes së rëndë dhe një vepër penale të vjedhjes së rëndë në tentativë.
Sipas njoftimit të Gjykatës, ngjarjet kanë ndodhur në janar të vitit 2025 në Prizren. Më 12 janar, i akuzuari, në bashkëpunim me një person tjetër, dyshohet se ka depërtuar në një argjendari gjatë natës dhe ka marrë rreth 3 kilogramë ar 14 karat, monedha ari, argjend dhe pajisje të tjera, duke i shkaktuar të dëmtuarit dëm material prej rreth 195 mijë eurosh.
Po të njëjtën ditë, sipas aktgjykimit, ai dyshohet se ka tentuar të kryejë një tjetër vjedhje në një lokal argjendarie, por nuk ka arritur të hapë kasafortën dhe është larguar nga vendi i ngjarjes.
Ndërsa më 23 janar 2025, i akuzuari është shpallur fajtor edhe për një vjedhje tjetër, ku përmes dëmtimit të një pjese të objektit kishte marrë pajisje elektronike dhe kishte dëmtuar sistemin e kamerave.
Pas nëntë seancave gjyqësore, Gjykata e ka dënuar Sh.H. me shtatë vjet burgim unik dhe me gjobë prej 2 mijë eurosh.
Gjithashtu, gjykata e ka obliguar të akuzuarin që të kompensojë dëmin prej 195 mijë eurosh ndaj të dëmtuarit. Në rast të moskompensimit, do të shiten pasuritë e ngrira të tij, përfshirë një apartament prej 117 metrash katrorë dhe disa automjete, përmes ankandit publik nga Agjencia për Administrimin e Pasurisë së Sekuestruar ose të Konfiskuar.
Masa e paraburgimit ndaj Sh.H. është vazhduar deri në plotfuqishmërinë e aktgjykimit.
