Një nismë e re qytetare me emrin “Lidhja e Prishtinës” është prezantuar sot publikisht, duke synuar të sjellë një frymë të re në angazhimin politik dhe qytetar në kryeqytet.
Iniciativa është bërë publike nga kryesuesi i Kuvendit Komunal të Prishtinës, Fehmi Kupina.
Kupina tha se qëllimi është të rikthehet vendimmarrja në duart e qytetarëve dhe transparenca në institucione.
“Në Lidhjen e Prishtinës jemi bërë bashkë gra dhe burra, profesionistë e aktivistë të komunitetit, që e duam Prishtinën dhe që ndajmë të njëjtin vizion për të” u shpreh Kupina.
Ai shtoi se nisma synon të ruajë trashëgiminë kulturore të qytetit, ndërkohë që përgatitet për sfidat e së ardhmes.
“Jemi bërë bashkë që ta ruajmë traditën dhe ta ndërtojmë të ardhmen. Jemi bërë bashkë që ta bëjmë Prishtinën vend më të mirë për fëmijët tanë”, ka shkruar tutje Kupina.
Në fokus të angazhimit të “Lidhjes së Prishtinës” do të jetë përfaqësimi në Kuvendin Komunal, me një listë që, sipas Kupinës, do të jetë “lista më e mirë për qytetin.”
“Do të jemi zëri i qytetarëve aty ku merren vendimet më të rëndësishme, në sy të qytetarit e jo prapa dyerve të mbyllura,” theksoi ai.
