Vonesa në kryerjen e obligimeve kontraktuale, lidhje të kontratave në mungesë të fondeve, e pagesa pa kryerjen e punimeve, ka evidentuar Zyra Kombëtare e Auditimit gjatë auditimit të pasqyrave financiare të Komunës së Fushë-Kosovës. Auditori ka evidentuar edhe shkelje në procedura të prokurimit
Afro 850 mijë euro i ka paguar Komuna e Fushë-Kosovës, si kosto shtesë, për procedura përmbarimore dhe vendimeve gjyqësore, shkaku i mospagesës me kohë të obligimeve ndaj kontraktueseve, si dhe atyre të dala nga kontrata kolektive për personelin arsimor.
Ndonëse Ligji për Menaxhimin e Parasë publike përcakton që çdo faturë e vlefshme dhe kërkesë për pagim për mallra dhe shërbime të furnizuara, apo punë të realizuara, të bëhet brenda 30 ditësh nga pranimi i saj, kjo komunë, në disa raste, është vonuar deri në 200 ditë kalendarike.
Sipas raportit të Zyrës Kombëtare të Auditimit, për Komunën e Fushë-Kosovës, 7 fatura, në vlerë totale prej afro 47 mijë euro, kanë mbetur pa u paguar brenda afatit kohor ligjor.
Sipas ZKA-së, vonesat në ekzekutimin e pagesave ishin nga 27 deri në 200 ditë kalendarike.
“Sipas regjistrit të siguruar nga komuna, gjatë vitit 2024, si rezultat i procedurave përmbarimore dhe vendimeve gjyqësore për mospagimin me kohë të obligimeve ndaj kontraktuesve, si dhe obligimeve nga kontrata kolektive për personelin arsimor, në emër të kamatave, tarifave të përmbarimit dhe shpenzimeve të tjera gjyqësore, janë paguar kosto shtesë në vlerë 847.882 euro”, thuhet në raportin e ZKA-së.
E, kjo, sipas ZKA-së, që i ka evidentuar dy raste të tilla, ka ndodhur për shkak të hyrjes në obligime financiare pa pasur fonde buxhetore të planifikuara dhe mangësive në menaxhimin e obligimeve.
Derisa në disa raste është vonuar me pagesa, në disa të tjera kjo komunë, në kundërshtim me rregullat e prokurimit publik, ka kryer pagesa pa u kryer punimet dhe furnizimi.
“Kontrata ‘Ndërtimi i palestrës sportive në fshatin Sllatinë e Vogël’, në vlerë prej 2.188,259€, janë paguar furnizime dhe punë të papërfunduara në tërësi në vlerë prej 361.775€. Kjo kishte ndodhur te pozicioni 14.7 – furnizimi, prodhimi dhe montimi i fasadës lineare me kapakë, në vlerë prej 21.025€, dhe pozicioni 14.8 – furnizimi, prodhimi dhe montimi i fasadës së ventiluar, sistemi i fasadës meteon, në vlerë prej 340.750€”, thuhet në raport
ZKA-ja i evidentoi edhe katër raste të ngjashme.
Gjatë auditimit në këtë Komunë u vu në pah se në pesë raste nuk u vazhdua masa e sigurisë së tenderit.
Mosvazhdimi i kësaj mase nuk e garanton mbulimin e dëmeve dhe shpenzimeve në rast të mospërmbushjes së kontratës nga ana e kontraktuesit.
Shkelje pati edhe në procedura të tenderimit. Komuna, sipas ZKA-së, përzgjodhi një operator të papërgjegjshëm për ndërtimin e shkollës fillore në rrugën “Fazli Grajçevci”.
Në raport thuhet se fituesi i tenderit nuk i kishte paraqitur pasqyrat e audituara në kopje të noterizuar, siç kërkohej me dosjen e tenderit dhe njoftimin për kontratë.
KOHA ka kontaktuar me Komunën e Fushë-Kosovës për ta marrë një qëndrim për gjetjet e ZKA-së, por zyrtarë të saj kanë thënë se aktualisht nuk kanë një të angazhuar për media dhe nënkryetari, i cili përgjigjet për çështje të Komunës, ndodhet në udhëtim zyrtar.
Komentet e komunës kanë munguar edhe në raportin e ZKA-së.
