Presidenti i Ukrainës, Volodymyr Zelensky ka deklaruar se SHBA i ka dhënë afat Rusisë dhe vendit të tij deri në qershor për t’i dhënë fund luftës.
“Amerikanët po propozojnë që palët ta përfundojnë luftën deri në fillim të verës dhe ndoshta do të ushtrojnë presion mbi palët pikërisht sipas këtij orari. Dhe ata thonë se duan të bëjnë gjithçka deri në qershor. Dhe do të bëjnë gjithçka për t’i dhënë fund luftës”, tha Zelensky.
Presidenti ukrainas theksoi gjithashtu se vendi i tij nuk do të pranojë që Shtetet e Bashkuara të bëjnë marrëveshje me Rusinë në lidhje me sovranitetin e Ukrainës, përveç nëse përfshihet edhe Kievi.
Ai zbuloi gjithashtu se SHBA-ja ka propozuar mbajtjen e raundit të ardhshëm të bisedimeve trepalëshe javën e ardhshme në vendin e tyre për herë të parë, ndoshta në Miami. “Ne e kemi konfirmuar pjesëmarrjen tonë”, theksoi ai.
Afati i fundit vjen pasi bisedimet trepalëshe të ndërmjetësuara nga SHBA-të në Abu Dhabi nuk arritën të jepnin ndonjë përparim, pasi palët ndërluftuese u kapën pas kërkesave që përjashtonin njëra-tjetrën. Rusia po i bën presion Ukrainës që të tërhiqet nga Donbasi, ku luftimet mbeten të ashpra – një kusht që Kievi thotë se nuk do ta pranojë kurrë.
Vlen të përmendet se raportet e mëparshme sugjeronin se SHBA kishte vendosur një qëllim për t’i dhënë fund luftës në mars, ndërsa vetë Donald Trump deklaroi se ishte optimist për progresin e bisedimeve.
