Në qytetin e Podujevës është zbuluar shtatorja e ish presidentit Ibrahim Rugovës.
Në ceremoninë e organizuar kanë marrë pjesë edhe shumë liderë politikë dhe institucionalë të Kosovës.
Në këtë ceremoni ishin prezentë kryeministri Albin Kurti, presidentja Vjosa Osmani, ministrat Donika Gërvalla e Faton Peci dhe shumë zyrtarë të LDK-së dhe familja e Rugovës.
Presidentja e Kosovës, Vjosa Osmani potencoi Rugovën si arkitekt të shtetit tonë, tha se ai po i kthehet Llapit në bronz, duke u bërë banor i përjetshëm i kësaj komune.
Ajo potencoi se Kushtetuta e Kaçanikut është një moment historik në udhëtimin e Kosovës drejt lirisë.
Osmani tha se kjo shtatore nuk është vetëm një vepër arti, por edhe një testament i idealeve për të cilat Rugova punoi deri vdekje për një Kosovë të lirë dhe demokratike.
Ajo theksoi se presidenti Rugova qëndroi i palëkundur në vizionin e tij edhe në ditët më të errëta të Kosovës.
Në një fjalë rasti, djali i ish- presidentit Rugova, Ukë Rugova përgëzoi skulptorin Gëzim Muriqin për krijimin e kësaj shtatoreje, derisa tregoi edhe domethënien e pamjes së shtatores.
