Mbrëmjen e së mërkurës do të kemi ardhjen e frontit të ftohtë nga veriperëndimi dhe veriu i Kontinentit. Ky front së bashku me ciklonin kalimtar do të kushtëzojnë përpos reshje dhe rrebesheve të shiut edhe reshje bore në shumë rajone të Republikës së Kosovës.
Intervale reshjesh të dendura bore priten në shumë zona kodrinore-malore të Kosovës, ndërsa reshje bore po ashtu priten edhe në disa zona më të ulëta mbidetare duke krijuar edhe shtresa simbolike dekorative.
Normalisht, reshje bore nuk duhet pritur në çdo cep të territorit, por kësaj radhe reshje do të jenë më të përhapura.
Reshjet lokale herë pas here të borës do të vazhdojnë gjatë orëve të natës mes së mërkurës dhe së enjtes, por edhe gjatë ditës së enjte duke u lokalizuar në rajone kodrinore-malore. Në shumë vise priten intervale reshjesh të dendura bore që na përkujtojnë që ende jemi në dimër, megjithatë kjo “goditje” e Marsit do të jetë jetëshkurtër ashtu edhe siç pritet, ngase nga e premtja pritet përmirësim gradual i motit.
Reshje bore priten edhe në gjysmën lindore të Shqipërisë, luginën e Preshevës dhe shumë pjesë të Maqedonisë së Veriut, normalisht të koncentruara në viset kodrinore-malore, por lokalisht edhe në disa ultësira.
Ky ciklon sipas të gjitha gjasave do të jetë më i forti gjatë këtij dimri i kombinuar me më shumë lagështi dhe masa të ftohta ajrore dhe ndikimi i tij do të jetë paksa më i gjatë se frontet e dobëta gjatë gati tërë këtij dimri.
Përmirësimi i motit do të ndjehet veçanërisht gjatë fundjavës.
