Policia e Kosovës ka iniciuar një rast për falsifikim të dokumenteve pasi gjatë një kontrolli në pikën kufitare në Jarinjë janë gjetur disa dokumente të dyshuara si të falsifikuara.
Sipas raportit policor, ngjarja ka ndodhur të mërkurën, kur njësia policore ka ndaluar për kontroll një veturë me targa të Serbisë, në të cilën ndodheshin dy meshkuj shtetas të Serbisë.
Gjatë kontrollit të automjetit, zyrtarët policorë kanë hasur në disa dokumente të dyshuara si të falsifikuara, të cilat janë sekuestruar për ekzaminime të mëtejshme.
Me urdhër të prokurorit, dy personat janë intervistuar në cilësinë e dëshmitarëve. Pas procedurave të nevojshme dhe inicimit të rastit, ata janë liruar në procedurë të rregullt, ndërsa hetimet lidhur me rastin po vazhdojnë.
