Programi i Kombeve të Bashkuara për Zhvillim (UNDP) Kosovë ka lansuar zyrtarisht konkursin e pikturës për të rinj “Vija që Pikturon Rinia”, si pjesë e fushatës globale “16 Ditët e Aktivizmit kundër Dhunës me Bazë Gjinore”.
Konkursi fton nxënësit e shkollave të mesme nga të gjitha komunat që, përmes artit, të reflektojnë mbi pyetjen “Ku fillon gjithçka?”, duke eksploruar shenjat e hershme dhe shkaqet rrënjësore të dhunës me bazë gjinore dhe pabarazisë gjinore, si dhe vlerat që mund ta parandalojnë atë – respektin, barazinë, empatinë dhe pëlqimin.
Përmes kësaj nisme, UNDP synon të fuqizojë të rinjtë si agjentë të ndryshimit, të sfidojë normat e dëmshme gjinore dhe të nxisë reflektim të gjerë mbi mënyrat se si dhuna mund të parandalohet në familje, shkolla dhe komunitete.
Çdo shkollë do të përzgjedhë një vepër fituese që do t’i dorëzohet UNDP-së, pas së cilës një juri e përbërë nga përfaqësues të institucioneve qendrore, partnerë ndërkombëtarë, komunitetit artistik dhe shoqërisë civile do të përzgjedhë 30 piktura që do të ekspozohen në ngjarjen përmbyllëse më 9 dhjetor 2025.
Si të aplikojnë shkollat
- Caktoni një pikë kontakti: Çdo shkollë zgjedh një mësimdhënës apo anëtar të stafit për të koordinuar konkursin, shpjeguar temën për nxënësit dhe për t’i inkurajuar ata të marrin pjesë.
- Mblidhni pikturat e nxënësve: Nxënësit krijojnë dhe dorëzojnë pikturat e tyre origjinale te pika e kontaktit në shkollë deri në afatin e brendshëm të përcaktuar nga shkolla.
- Zgjidhni fituesin e shkollës: Shkolla përzgjedh një vepër fituese që do ta përfaqësojë në konkurs.
- Dërgoni në UNDP: Pika e kontaktit e dërgon pikturën e përzgjedhur në formë digjitale, bashkë me formularin e nënshkruar të pëlqimit, nga 17 tetor deri më 28 tetor 2025, në adresën: [email protected]
Konkursi organizohet me mbështetjen e Zyrës së Koordinatorit të Kombeve të Bashkuara, dhe në bashkëpunim me Ambasadat e Austrisë, Francës, Gjermanisë, Britanisë së Madhe, Suedisë, si dhe Zyrën e Bashkimit Evropian në Kosovë.
Fituesit do të marrin pajisje profesionale arti për të mbështetur zhvillimin e tyre krijues, si dhe do të shpallen “Ambasadorë për një Ditë.”
Të gjitha shkollat e mesme inkurajohen të promovojnë pjesëmarrjen dhe të mbështesin nxënësit në shprehjen e vizionit të tyre për një shoqëri të respektueshme dhe të sigurt për të gjithë.
